Rritja e rezistencës ndaj antibiotikëve dhe barnave të tjera, rrezikon ta kthejë kirurgjinë rutinë dhe lindjen e fëmijëve në procese kërcënuese për jetën, duke vënë në rrezik edhe të ardhmen e mjekësisë moderne, paralajmëroi sot Organizata Botërore e Shëndetësisë (OBSH).

“Rezistenca ndaj antibiotikëve, por në një kuptim më të gjerë rezistenca antimikrobike (AMR), është përhapur gjerësisht dhe po kërcënon të ardhmen e mjekësisë moderne”, deklaroi specialisti i OBSH-së, Jean Pierre Nyemazi.

Pacientët me kancer dhe personat që vuajnë nga sëmundje kronike, përballen gjithashtu me rreziqe më të mëdha nga infeksionet e shkaktuara prej baktereve, viruseve ose kërpudhave, të cilat nuk reagojnë më ndaj trajtimeve të disponueshme.

OBSH-ja u bën thirrje vendeve të shtojnë përpjekjet për të luftuar rezistencën antimikrobike, gjatë Javës së Ndërgjegjësimit, që zhvillohet nga 18 deri më 24 nëntor.

“Më shumë se 1 milion njerëz vlerësohet se kanë humbur jetën në vitin 2021, si pasojë e drejtpërdrejtë e rezistencës antimikrobike”, tha Nyemazi.

“Nëse tendencat aktuale vazhdojnë, sipas modeleve parashikuese, kjo rezistencë mund të shkaktojë 39 milionë vdekje në mbarë botën gjatë 25 viteve të ardhshme”, shtoi ai.

Numri i baktereve rezistente ndaj barnave që përdoren gjerësisht po rritet, ndërsa zhvillimi i antibiotikëve të rinj mbetet i pamjaftueshëm.

“Parandalimi i infeksioneve është një nga mënyrat më efektive për të ulur nevojën për përdorimin e antibiotikëve”, deklaroi specialistja e OBSH-së, Pravarsha Prakash.

Megjithatë, vetëm pak më shumë se një e treta e vendeve kanë zbatuar plotësisht, në nivel kombëtar udhëzimet e OBSH-së për parandalimin e infeksioneve.

Sipas OBSH-së, shumë vende janë ende larg përmbushjes së objektivave të përcaktuara nga Asambleja Botërore e Shëndetësisë në vitin 2024, të cilat duhet të arrihen deri në vitin 2030.

Këto objektiva përfshijnë parandalimin e infeksioneve, përdorimin e barnave në spitale, kapacitetet për kryerjen e testeve dhe monitorimin e rezistencës ndaj ilaçeve.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: