Papa Leo XIV bëri thirrje të martën për një armëpushim global në Ditën e Krishtlindjeve, duke shprehur “trishtim të madh” që “me sa duket Rusia hodhi poshtë një kërkesë” për një të tillë.
“Po e ripërtëri kërkesën time për të gjithë njerëzit me vullnet të mirë që të respektojnë një ditë paqeje – të paktën në festën e lindjes së Shpëtimtarit tonë”, u tha Leo gazetarëve në rezidencën e tij në Castel Gandolfo pranë Romës.
Rusia pushtoi Ukrainën në shkurt të vitit 2022 dhe ka hedhur poshtë vazhdimisht thirrjet për armëpushim duke thënë se kjo do t’i jepte vetëm një avantazh ushtarak Ukrainës.
“Ndër gjërat që më shkaktojnë trishtim të madh është fakti që Rusia me sa duket ka hedhur poshtë një kërkesë për armëpushim”, tha Papa.
Duke iu referuar konflikteve në përgjithësi, Leo tha: “Shpresoj se do të dëgjojnë dhe do të ketë 24 orë paqe në të gjithë botën”, shtoi ai.
Ukraina të martën tërhoqi trupat nga një qytet në lindje të vendit pas betejave të ashpra me forcat ruse, ndërsa sulmet e pamëshirshme nga Moska vranë tre civilë dhe ndërprenë energjinë elektrike për mijëra njerëz në temperaturat e ulëta të dimrit.
Nuk kishte asnjë shenjë të një përparimi të afërt pasi negociatorët kryesorë nga Rusia dhe Ukraina ishin në Miami fundjavën e kaluar për takime të ndara me zyrtarë amerikanë duke kërkuar një marrëveshje për t’i dhënë fund pothuajse katër viteve të luftimeve.
Papa Leo u takua me Presidentin ukrainas Volodymyr Zelensky në fillim të këtij muaji.
I pyetur nëse do ta pranonte ftesën e Zelensky për të vizituar Ukrainën, Leo më vonë tha “Shpresoj”, por paralajmëroi se nuk ishte e mundur të thuhej se kur një udhëtim i tillë do të ishte i mundur.
Ai tha gjithashtu se kërkimi i paqes në Ukrainë pa përfshirjen diplomatike evropiane ishte “jorealiste” dhe paralajmëroi se plani i paqes i propozuar nga Presidenti i SHBA-së Donald Trump rrezikonte një “ndryshim të madh” në aleancën transatlantike.
