Presidenti i Ukrainës, Volodymyr Zelensky, do të takohet sot në Florida me Presidentin e Shteteve të Bashkuara, Donald Trump, në kuadër të raundit të fundit të bisedimeve që synojnë t’i japin fund luftës gati katërvjeçare me Rusinë. Takimi do të zhvillohet në rezidencën e Trump në Mar-a-Lago.
Dy liderët pritet të diskutojnë një version të përditësuar të planit të paqes të ndërmjetësuar nga SHBA-ja, i cili ende nuk është mbështetur nga Moska, si dhe propozime specifike për garancitë e sigurisë amerikane për Ukrainën. Në fokus do të jetë edhe drafti i ri i planit të paqes me 20 pika, një version i rishikuar i planit të mëparshëm me 28 pika të hartuar nga i dërguari special i SHBA-së, Steve Witkoff, i cili ishte kritikuar si tepër i favorshëm për Rusinë.
Takimi vjen pas bombardimeve intensive ruse ndaj Kievit gjatë fundjavës. Autoritetet ukrainase njoftuan se një sulm 10-orësh me raketa dhe dronë vrau dy persona dhe la 32 të tjerë të plagosur. Zelensky i cilësoi sulmet si dëshmi se Moska “nuk dëshiron paqe”, duke shtuar se ato ishin “përgjigjja e Rusisë ndaj përpjekjeve tona diplomatike”.
Presidenti ukrainas pritet të ngrejë në takim çështjen e garancive të sigurisë dhe lëshimeve territoriale, dy tema për të cilat Rusia deri tani ka refuzuar kompromisin. Kontrolli i Donbasit lindor mbetet një nga pengesat kryesore në negociata. Aktualisht, Rusia kontrollon rreth 75% të rajonit të Donetskut dhe rreth 99% të Luhanskut, të njohura së bashku si Donbas. Zelensky ka sugjeruar së fundmi se krijimi i një “zone të lirë ekonomike” mund të jetë një alternativë e mundshme.
Kremlini nuk ka komentuar ofertën e Zelensky-t për tërheqjen e trupave nga Donbasi, nëse edhe Rusia do të bënte të njëjtën gjë. Ndërkohë, presidenti rus Vladimir Putin deklaroi se Ukraina “nuk po nxiton ta zgjidhë konfliktin në mënyrë paqësore”, duke paralajmëruar se Moska do t’i arrijë objektivat e saj me mjete ushtarake nëse diplomacia dështon.
Zelensky ka shprehur optimizëm për planin e ri të paqes, duke e quajtur atë “një dokument themelor për përfundimin e luftës”. Ai tha se drafti 20-pikësh është rreth 90% i përfunduar dhe se synimi është që ai të jetë plotësisht gati.
Nga ana tjetër, Trump paralajmëroi në një intervistë për Politico se Zelensky “nuk ka asgjë derisa unë ta miratoj”, duke shtuar se pret ta shohë draftin e ri gjatë takimit të së dielës. Trump tha gjithashtu se pret që plani të ecë mirë si me Zelenskyn ashtu edhe me presidentin rus Vladimir Putin, me të cilin synon të flasë së shpejti.
Sulmet e fundit ruse kanë shkaktuar dëme të mëdha në infrastrukturën energjetike të Ukrainës. Sipas autoriteteve, rreth 40% e ndërtesave të banimit në Kiev dhe zonat përreth mbetën pa ngrohje. Ministria ruse e Mbrojtjes deklaroi se kishte përdorur armë precize me rreze të gjatë për të goditur objekte energjetike që, sipas saj, përdoreshin për qëllime ushtarake.
Sipas zyrtarëve ukrainas, Rusia lëshoi pothuajse 500 dronë dhe 40 raketa drejt Kievit, duke synuar infrastrukturën energjetike dhe civile. Sulmi vuri në gatishmëri edhe Poloninë fqinje, e cila aktivizoi avionët luftarakë dhe sistemet e mbrojtjes ajrore, megjithëse më pas u konfirmua se nuk kishte pasur shkelje të hapësirës ajrore polake.
Ndërkohë, Ministria ruse e Mbrojtjes njoftoi se sistemet e saj të mbrojtjes ajrore kishin rrëzuar pothuajse 200 dronë ukrainas mbi disa rajone të Rusisë, përfshirë tetë mbi Moskë.
