Më shumë se 50 pengje izraelite të liruar i kërkuan kryeministrit Benjamin Netanyahu që të zbatojë plotësisht marrëveshjen e armëpushimit të Gazës dhe të sigurojë lirimin e atyre që ende mbahen në territorin palestinez.

“Ne që e kemi përjetuar ferrin e dimë se kthimi në luftë është kërcënues për jetën për ata që kanë mbetur ende pas”, tha një grup prej 56 pengjesh të liruar në një letër të postuar në platformën e mediave sociale Instagram.

“Zbatoni marrëveshjen në tërësi, në një manovër të vetme”.

Midis atyre që nënshkruan letrën ishte Yarden Bibas, gruaja e të cilit dhe dy djemtë e vegjël vdiqën ndërsa mbaheshin rob në Gaza.

Lutja e tyre erdhi pasi Hamasi publikoi një video që tregonte të gjallë pengun izraelit Matan Angrest, pamje që familja e tij tha se i kishte lënë ata “të tronditur”.

Në pamje, Angrest, i cili mbushi 22 vjeç në nëntor, u bën thirrje gjithashtu autoriteteve izraelite të zbatojnë fazën e dytë të marrëveshjes së armëpushimit të Gazës.

Faza e parë e armëpushimit të Gazës përfundoi më 1 mars pas gjashtë javësh qetësie relative që përfshinte shkëmbimin e pengjeve izraelite për të burgosurit palestinezë, megjithëse armiqësitë nuk kanë rifilluar.

Ndërsa Izraeli ka thënë se dëshiron të zgjasë fazën e parë deri në mes të prillit, Hamasi ka këmbëngulur për një kalim në fazën e dytë, e cila duhet të çojë në një fund të përhershëm të luftës.

Nga 251 pengjet e marra nga militantët palestinezë gjatë sulmit të vitit 2023 ndaj Izraelit, 58 mbeten në Gaza, përfshirë 34 që ushtria izraelite ka thënë se janë të vdekur.

Të shtunën, një delegacion i nivelit të lartë të Hamasit zhvilloi bisedime me zyrtarët egjiptianë mbi fazën e dytë të armëpushimit.

Delegacioni u takua me zyrtarët egjiptianë të shtunën për të diskutuar zhvillimet e fundit, për të vlerësuar progresin në zbatimin e marrëveshjes së armëpushimit dhe për të adresuar çështjet që lidhen me nisjen e fazës së dytë të marrëveshjes.

Gjatë bisedimeve me ndërmjetësit egjiptianë, delegacioni i Hamasit kërkoi që Izraeli “të zbatojë marrëveshjen, të fillojë negociatat për fazën e dytë dhe të hapë pikat kufitare për të lejuar ndihmën humanitare në Rripin e Gazës”, tha ai.

Grupi militant palestinez dëshiron një “marrëveshje gjithëpërfshirëse që siguron një armëpushim të përhershëm dhe të plotë”, tha zyrtari tjetër.

Ai tha se kërkesat e Hamasit për fazën e dytë përfshijnë tërheqjen e plotë të Izraelit nga Gaza, fundin e bllokadës, rindërtimin e territorit dhe mbështetjen financiare bazuar në vendimet e samitit arab të kësaj jave në Kajro.

Ai tha gjithashtu se Hamasi ishte i gatshëm të “negociojë një shkëmbim të burgosurish për të liruar të gjithë të burgosurit izraelitë, përfshirë ata me shtetësi amerikane”.

 

(A.A/BalkanWeb)