Mbahet sot në Gjykatën Kushtetuese seancë në lidhje me masën e sigurisë të vendosur ndaj zëvendës kryeministres Belinda Balluku, “pezullimi i ushtrimit të detyrës publike”, vendim i marrë nga Gjykata e Posaçme.
Partia Mundësia, zhvillon sot një protestë përballë Gjykatës Kushtetuese.
Kreu i Partisë Mundësia, Agron Shehaj dorëzoi në GJK 20 mijë firma qytetarësh në mbështetje të luftës kundër korrupsionit dhe fundit të pandëshkueshmërisë.
“Populli shqiptar është me drejtësinë kundër korrupsionit, që mos të dëgjojnë vetëm lobimet e politikanëve të korruptuar. Si Veliaj që thoshte gjyqtarët në Shqipëri arrestohen pa akuza. GJK u përdor një herë nga Rama në rastin e Veliajt në një vendim skandaloz. Qëllimi i dorëzimit të 20 mijë firmave është që të tregojmë se populli shqiptar është pro drejtësisë dhe ngrenë zërin për të treguar një Shqipëri ku pa ndëshkueshmëria merr fund. Do të mbledhim 100 mijë firma, nuk kanë vlerë juridike por simbolike që të tregojmë se populli shqiptar është me drejtësinë dhe kundër korrupsionit, ky është mesazhi që duam të përcjellim”, tha ai në një prononcim për mediat.
