Një incident i pazakontë për motive të parëndësishme është regjistruar dje në Heraklion, ku dy vëllezër, 60 dhe 57 vjeç, përfunduan duke u përleshur fizikisht pas një debati të ashpër.

Sipas mediave lokale, konflikti nuk kishte lidhje me çështje trashëgimie, por nisi nga një situatë e pazakontë: njëri prej vëllezërve mbështeti një fqinj, i cili po përpiqej të pastronte pluhurin afrikan që kishte mbuluar ishullin duke përdorur një zorrë uji.

Ky veprim shkaktoi reagim të menjëhershëm nga vëllai tjetër, ndërsa tensionet u rritën edhe më shumë kur u përmendën kostot e përbashkëta për faturën e ujit. Debati verbal degradoi shpejt në përplasje fizike mes tyre.

Në konflikt u përfshi edhe bashkëshortja e njërit prej vëllezërve, duke e përshkallëzuar më tej situatën. Si pasojë, të gjithë të përfshirët u shoqëruan në komisariat, ndërsa çështja përfundoi në zyrën për dhunën në familje. Autoritetet po hetojnë rrethanat e plota të ngjarjes.