Kreu i Grupit Parlamentar të Partisë Demokratike, Gazment Bardhi, i ftuar në emisionin “Kjo Javë” në News24, ka komentuar ndryshimet e shumta në qeveri, të konfirmuara sonte, duke zbuluar, sipas tij, detaje nga mbledhja e grupit parlamentar të Partisë Socialiste që u zhvillua paraditen e sotme.
Bardhi tha se, sipas një burimi brenda mbledhjes, kryeministri Edi Rama ka akuzuar qeverinë gjermane se po punon kundër interesave të Shqipërisë.
“Një burim brenda mbledhjes së grupit parlamentar të PS më konfirmon se Rama ka akuzuar qeverinë gjermane se po punon kundër interesave të Shqipërisë. Ka gjetur jo vetëm armikun e brendshëm si SPAK dhe opozitën, por edhe armikun e jashtëm që sipas tij është Gjermania”, u shpreh Bardhi.
Sipas tij, Rama ka pretenduar se Gjermania po mbështet drejtësinë shqiptare në hetimet për çështje si AKSHI dhe tenderin e portit të ri në Porto Romano, duke e konsideruar këtë si veprim kundër interesave të vendit.
Bardhi e cilësoi këtë qëndrim si të papranueshëm, duke deklaruar se “të akuzosh qeverinë gjermane si armike të vendit, sepse mbështet luftën ndaj korrupsionit, do të thotë të vendosësh interesin personal mbi atë kombëtar”.
