Presidenti turk, Recep Tayyip Erdogan, sapo ka mbërritur në Shtëpinë e Bardhë për takimin me Presidentin Trump.

I pyetur nga një gazetar nëse Trump do të “anulojë” ato që ai i quajti “vendime budallaqe” të administratës Biden për të mos i shitur raketa Patriot Turqisë, presidenti amerikan përgjigjet: “do ta diskutojmë këtë”.

«Mendoj se ai do të ketë sukses në blerjen e gjërave që do të donte të blinte», thotë Trump për Erdoganin, duke iu referuar avionëve luftarakë F-35 dhe F-16.

“Ai ka nevojë për gjëra të caktuara dhe unë kam nevojë për gjëra të caktuara”, vazhdon presidenti, “dhe ne do të arrijmë në një përfundim”.

Gjatë mandatit të parë të Trump, Shtetet e Bashkuara e përjashtuan Turqinë, një aleate të NATO-s, nga programi i saj kryesor i avionëve luftarakë F-35, pasi kjo e fundit bleu një sistem mbrojtës ajror nga Rusia.

Zyrtarët amerikanë shqetësoheshin se përdorimi i sistemit të raketave tokë-ajër S-400 të Rusisë nga Turqia mund të përdorej për të mbledhur të dhëna mbi aftësitë e F-35 dhe se informacioni mund të përfundonte në duart e Rusisë.

Por Trump javën e kaluar i dha Turqisë shpresë se një zgjidhje për çështjen është afër, ndërsa njoftoi planet për vizitën e Erdoganit.

“Po punojmë me Presidentin për shumë marrëveshje tregtare dhe ushtarake, duke përfshirë blerjen në shkallë të gjerë të avionëve Boeing, një marrëveshje të madhe për F-16 dhe një vazhdim të bisedimeve për F-35, të cilat presim të përfundojnë pozitivisht”, tha Trump në një postim në rrjetet sociale.

I pyetur nga një gazetar teksa përshëndeti Erdoganin me mbërritjen e tij në Shtëpinë e Bardhë të enjten në mëngjes, Trump u përgjigj: “Do ta zbuloni vetë”.