Administrata e Presidentit amerikan, Donald Trump, po shqyrton mundësinë e sekuestrimit ose bllokimit të Ishullit Kharg të Iranit, një nga pikat kyçe të eksporteve të naftës iraniane, sipas burimeve të Axios. Ky hap synon të ushtrojë presion mbi Teheranin për të rihapur Ngushticën e Hormuzit, e cila është jetike për transportin detar të naftës dhe gazit.

Ishulli Kharg ndodhet rreth 30 kilometra larg bregdetit iranian dhe nga aty eksportohet rreth 90% e naftës së vendit. Një operacion i tillë do t’i vendoste trupat amerikane direkt në vijën e zjarrit, ndaj çdo veprim pritet të ndërmerret vetëm pasi të kufizohen më tej kapacitetet ushtarake të Iranit në rajon.

Një zyrtar i lartë i administratës amerikane deklaroi: “Ai dëshiron që Hormuzi të hapet. Nëse i duhet të marrë Ishullin Kharg për ta arritur këtë, ai do ta bëjë. Por ky vendim nuk është marrë ende.”. Tre njësi të Marinës Amerikane janë tashmë në rrugë drejt rajonit, ndërsa Shtëpia e Bardhë dhe Pentagoni po shqyrtojnë dërgimin e më shumë trupave. Operacioni, nëse miratohet, do të kërkojë forca shtesë dhe do të përdoret si mjet negociimi në marrëdhëniet me Iranin.

Fillimisht, Trump kishte planifikuar të përfundonte konfliktin përpara udhëtimit të tij në Kinë në fund të marsit, por kriza në Ngushticë e ka shtyrë këtë plan. Një burim i afërt me Shtëpinë e Bardhë tha: “Na duhet rreth një muaj për t’i dobësuar më tej iranianët me sulme, për të pushtuar ishullin dhe për ta përdorur këtë për negociata.”. Ky zhvillim pasqyron tensionet e larta në Gjirin Persik dhe rëndësinë strategjike të Ngushticës së Hormuzit për tregun global të energjisë.