Presidenti i Shteteve të Bashkuara, Donald Trump, inkurajoi uljen e tensioneve midis Indisë dhe Pakistanit, pas një përshkallëzimi të mprehtë midis dy vendeve. Ai tha në Zyrën Ovale se ishte i gatshëm të ndihmonte në zbutjen e dhunës aktuale.

“Pozicioni im është se shkoj mirë me të dy. I njoh të dy shumë mirë dhe dua t’i shoh duke e zgjidhur çështjen. Dua t’i shoh të ndalen dhe shpresoj që të mund të ndalen tani”, tha Trump, duke shtuar se situata ishte “shumë e tmerrshme”.

“Ata janë përballur me njëra-tjetrën, kështu që shpresojmë se mund të ndalen tani, por unë i njoh të dyja. Ne shkojmë mirë me të dyja vendet, kemi marrëdhënie të mira me të dyja, dhe dua ta shoh këtë të ndalet. Dhe nëse mund të bëj diçka për të ndihmuar, do ta bëj. Do të jem atje”, tha ai.

Deri më tani, nuk është e qartë se sa rol ndërmjetësues kanë luajtur SHBA-të në konflikt. Sekretari i Shtetit Marco Rubio, i cili është gjithashtu këshilltari i përkohshëm i sigurisë kombëtare, foli me zyrtarë nga India dhe Pakistani.

 

(A.A/BalkanWeb)