Një person është vrarë dhe disa të tjerë janë plagosur pas të shtënave me armë përgjatë kufirit Tajlandë–Kamboxhia, teksa tensionet midis dy vendeve janë rikthyer vetëm pak ditë pasi një marrëveshje armëpushimi e mbështetur nga presidenti amerikan Donald Trump është shembur.

Sipas autoriteteve kamboxhiane, incidenti ndodhi në rajonin Prey Chan, në veriperëndim të vendit, ku një civil humbi jetën dhe tre të tjerë u plagosën.

“Ky veprim shkon kundër frymës humanitare dhe marrëveshjeve të fundit për zgjidhje paqësore”, tha kryeministri kamboxhian Hun Manet në një deklaratë për shtyp.

Luftimet midis trupave të dy vendeve  shpërthyen në korrik, duke lënë 43 të vdekur dhe rreth 300,000 të zhvendosur – përplasjet më të rënda kufitare në më shumë se një dekadë.

Në tetor, me ndërmjetësimin e Trump në Malajzi, Tajlanda dhe Kamboxhia nënshkruan një armëpushim të përkohshëm, pasi Uashingtoni kishte kërcënuar me heqjen e privilegjeve tregtare në rast se dhuna do të vazhdonte.

Por armëpushimi u thye të hënën, pasi një ushtar tajlandez humbi një këmbë nga një shpërthim mine tokësore. Tajlanda fajësoi Kamboxhian për incidentin, duke pretenduar se mina ishte vendosur rishtas, dhe njoftoi pezullimin e kushteve të marrëveshjes.

Dy ditë më vonë, shpërthyen të shtëna të ashpra përgjatë kufirit midis provincës Sa Kaeo në Tajlandë dhe Banteay Meanchey në Kamboxhia.

Të dyja qeveritë fajësojnë njëra-tjetrën për përshkallëzimin. Zëdhënësi i ushtrisë tajlandeze, Winthai Suvaree, tha se trupat kamboxhiane “kanë qëlluar brenda territorit tajlandez”. Ndërkohë, Phnom Penh i akuzon forcat tajlandeze për “provokim të qëllimshëm”.