Presidenti rus Vladimir Putin dhe Shefi i Shtabit të Përgjithshëm Valery Gerasimov njoftuan të enjten pushtimin e qytetit të Siverskut në Ukrainën lindore , i cili sipas tyre hap rrugën për përparime të mëtejshme.
Si rezultat, operacione të reja në drejtime të tjera në Donbas janë të mundshme, tha Putin gjatë një takimi të transmetuar drejtpërdrejt në televizionin shtetëror rus.
Pala ukrainase ende nuk e ka pranuar zyrtarisht humbjen e qytetit.
Ushtria ruse e sheh qëllimin e radhës si pushtimin e qytetit të Slovianskut, i cili kishte rreth 100,000 banorë para se të shpërthente lufta në shkurt të vitit 2022.
Putin vlerësoi “dinamizmin” e veprimeve të njësive të ushtrisë ruse në vijën e frontit, duke u shfaqur shumë më entuziast krahasuar me sjelljen e tij të zakonshme shumë të rezervuar, duke i lajkatuar burrat e tij “të mrekullueshëm” dhe duke thënë se i “përqafon” ata.
Iniciativa strategjike është plotësisht në duart e forcave të armatosura ruse, tha ai, duke shtuar se pushtimi i plotë i rajoneve Donetsk, Luhansk, Kherson dhe Zaporizhia – të cilat Moska i ka aneksuar zyrtarisht – po përparon.
Ai nuk përmendi negociatat për t’i dhënë fund luftës bazuar në një propozim të paraqitur fillimisht nga Presidenti i SHBA-së Donald Trump, por i cili u modifikua gjerësisht nga qeveria ukrainase dhe aleatët e saj evropianë dhe u kthye për diskutim.
Presidenti rus e përshkroi propozimin e Trump si një bazë për bisedime, por shtoi se ushtria ruse do të arrinte qëllimet e saj në fushën e betejës nëse Kievi do të refuzonte kushtet e Moskës për një zgjidhje.
Kremlini po kërkon veçanërisht lëshimin e të gjithë Donbasit, me fjalë të tjera tërheqjen e forcave ukrainase nga zonat nën kontrollin e tij. Kievi e hedh poshtë këtë perspektivë.
Dje, Putini riafirmoi qëllimin e “dëbimit të formacioneve ukrainase nga territori ynë dhe rivendosjes së jetës paqësore në tokën e Donbasit”.
Pardje, Shtabi i Përgjithshëm i Ukrainës siguroi se sulmet ruse ishin zmbrapsur. Blogerët ukrainas që monitorojnë sistematikisht rrjedhën e luftës raportuan, duke cituar harta, se pjesa më e madhe e qytetit pretendohet, por nuk është pushtuar nga ushtria ruse.
Megjithatë, një deputete e pavarur ukrainase, Marianna Bezula, raportoi nëpërmjet Telegram se Siversku kishte rënë dhe akuzoi udhëheqjen ushtarake për “fshehje” dhe “gënjeshtra”.
