Probleme të reja për programin hapësinor rus. Dy satelitë të konstelacionit Rassvet, të projektuar si alternativë ruse ndaj rrjetit Starlink të Elon Musk, kanë nisur të humbasin lartësi dhe rrezikojnë të dalin nga orbita.
Sipas studiuesit të hapësirës Anatoly Zak, nga 17 satelitët e lëshuar në korrik, tre nuk arritën të vendoseshin në një orbitë të qëndrueshme në lartësinë e synuar prej rreth 500 kilometrash. Një tjetër satelit vijon përpjekjet për të fituar lartësi, ndërsa dy prej tyre kanë shfaqur probleme dhe kanë nisur të humbasin pozicionin orbital.
Vështirësitë nuk janë të para për projektin Rassvet. Edhe grupi i parë i satelitëve hasi probleme teknike: një prej tyre ka dalë tashmë nga orbita, ndërsa 14 të tjerët arritën të pozicionohen pak mbi 500 kilometra, shumë më poshtë se lartësia prej 800 kilometrash që ishte parashikuar fillimisht.
Projekti është një komponent i rëndësishëm i ambicieve të Rusisë për të krijuar një rrjet të pavarur komunikimi satelitor. Për të garantuar mbulim të pandërprerë, 24 orë në ditë, në të gjithë territorin rus, vendit i nevojiten të paktën 350 satelitë të këtij lloji.
Ndërkohë, ekspertë ukrainas kanë paralajmëruar se një sistem i tillë mund të përdoret edhe për qëllime ushtarake dhe potencialisht të përbëjë kërcënim për Forcat e Armatosura të Ukrainës.
Megjithatë, problemet e përsëritura teknike po vënë në pikëpyetje aftësinë e Moskës për të realizuar projektin dhe për të krijuar një alternativë funksionale ndaj Starlink. Për momentin, ambicia ruse për të konkurruar në hapësirë po përballet me vështirësi që i kanë lënë disa prej satelitëve në rrezik të rikthimit në Tokë.
