Gazetari Artan Hoxha ka deklaruar se heqja e imunitetit të zëvendëskryeministres Belinda Balluku nga Parlamenti është një proces i pashmangshëm, pavarësisht përpjekjeve për ta zvarritur atë. Komentet Hoxha i bëri i ftuar në studion e emisionit “Kjo Javë” në News24, ku foli për veprimtarinë e SPAK dhe zhvillimet e fundit politike në vend.
Sipas Hoxhës, si në rastin e ish-kryeministrit Sali Berisha, edhe në këtë rast, mazhoranca nuk ka mundësi reale për ta penguar procesin. “Do e zvarrisin sa të munden për të fituar kohë, por nuk kanë çfarë të bëjnë. Nuk mund ta shtyjnë pafundësisht, janë të detyruar ta lëshojnë Ballukun,” u shpreh ai.
Gazetari shtoi se në situata të tilla ka individë që marrin përsipër përgjegjësi që nuk u takojnë, në përpjekje për të mbrojtur nivelet e larta të pushtetit, por theksoi se deri tani kjo strategji nuk ka funksionuar. “Nëse Berishës ia hoqën me vrap imunitetin, edhe për Ballukun do ndodhë e njëjta gjë,” tha Hoxha.
Ai parashikoi gjithashtu ndryshime të afërta në qeveri, duke deklaruar se në muajin janar pritet një riformatim dhe se Balluku nuk do të jetë më pjesë e kabinetit qeveritar. “Aq dijeni sa kam unë, në janar do ketë riformatim të qeverisë. Balluku nuk do jetë më,” u shpreh ai.
Hoxha theksoi se, ndryshe nga raste të mëparshme kur kryeministri Edi Rama, sipas tij, i hiqte figurat politike dhe i dorëzonte më pas drejtësisë, në këtë rast SPAK e ka kapur Ballukun në detyrë. Kjo, sipas gazetarit, ka sjellë çorientim në radhët e Partisë Socialiste.
“Nuk i kam parë kurrë deputetët e PS kaq të çorientuar si sot, nuk po u vinte urdhri. Edhe Rama vetë ndoshta nuk e ka ende të qartë si do të dalë nga kjo situatë. Çdo tender ku tërheq fijet Balluku, të çon te Kryeministria. Balluku është katapultuar,” përfundoi Artan Hoxha.
