Kryeministri Edi Rama ka ndarë një tjetër zhvillim të rëndësishëm për qytetin e Durrësit, duke vizituar kantierin e ndërtimit të një prej komplekseve sportive më të mëdha në vend dhe në rajon – Akademinë e Futbollit “Dyrrah City”, që po realizohet nga kompania Fortis Beton.

Në një postim në Facebook, Rama tha se kjo akademi po ngrihet si filial i Manchester City Football School and Academy, një nga emrat më të njohur në botën e futbollit.

 

Sipas tij, ky projekt është një shembull konkret i mënyrës se si investimet strategjike në sport jo vetëm rrisin cilësinë dhe mundësitë për të rinjtë, por e kthejnë Shqipërinë në një pikë referimi rajonale për zhvillimin e talenteve.

Ai theksoi se kompleksi do të jetë i pajisur me fusha futbolli, basketbolli, palestra, qendër fizioterapie, rezidencë për sportistët dhe një park rekreativ.

Kryeministri u shpreh se ky investim është një tjetër dëshmi se vizioni për Shqipërinë e së ardhmes po merr formë konkrete, duke përfshirë jo vetëm infrastrukturën, por edhe edukimin dhe sportin në nivelet më të larta ndërkombëtare.

(BalkanWeb)