Kreu i Partisë Demokratike, Sali Berisha, ka vijuar akuzat ndaj qeverisë lidhur me procesin zgjedhor, duke deklaruar se raporti i IBAR i miratuar më 21 maj nga strukturat e Bashkimi Evropian përmban kritika të forta për manipulimin e zgjedhjeve dhe përdorimin e rrjeteve të patronazhimit.
Në një deklaratë për mediat, Berisha paraqiti atë që e quajti krahasim “paragraf për paragraf” mes draft-raportit të muajit shkurt dhe versionit final të miratuar nga COELA më 21 maj. Sipas tij, në dokumentin përfundimtar janë hequr të gjitha pjesët që flisnin për progresin e Shqipërisë dhe fokusi është zhvendosur te kërkesat konkrete ndaj autoriteteve shqiptare.
“Tre faqe me lavdërime dhe narrativa progresi janë hequr plotësisht. Dokumenti kalon direkt te standardet dhe kërkesat ndaj qeverisë”, u shpreh Berisha. Ai tha se raporti i ri përmban kërkesa të drejtpërdrejta për zbatimin e rekomandimeve të OSBE/ODIHR përpara zgjedhjeve të ardhshme, duke interpretuar këtë si një shenjë se “qeveria nuk besohet më për proceset zgjedhore”. Berisha theksoi se, sipas tij, për herë të parë në një dokument europian përmendet ndikimi i “rrjeteve të patronazhimit”, të cilat ai i cilësoi si mekanizma presioni elektoral të lidhura me qeverinë. Sipas kreut të opozitës, raporti kërkon që Shqipëria të garantojë kushte të barabarta në zgjedhje dhe të marrë masa kundër keqpërdorimit të institucioneve dhe burimeve shtetërore.
“Tani, pikërisht për këtë qëllim, është paraqitur këtu në këtë tabelë, kjo është matrica në të cilën krahasohet paragraf për paragraf, raporti siç u paraqit nga Komisioni në shkurt të vitit 2026, në raportin siç u miratua nga COELA më 21 maj të vitit 2026 dhe që iu dërgua Këshillit të Ambasadorëve. Një punë jashtëzakonisht serioze. Siç e shihni, është ndërhyrë direkt në strukturën e dokumentit. Nga faqja 1 gjer në faqen 5 renditeshin vlerësime të përgjithshme për progresin e Shqipërisë në raportin e shkurtit. Kryq, vizë, hiqen totalisht. I hequr. Dokumenti i unifikuar fillon direkt me draft-pozicion. Seksioni i hyrjeve i lajleve dhe luleve hidhet në kosh. Çfarë është ky sinjal diplomatik? Shumë i fuqishëm. Eliminohet tërësisht narrativa e progresit të Shqipërisë. Tre faqe të mbushura me këtë narrativë dhe kalohet direkt në kërkesat ndaj standardeve. Pra, ky është një shërbim i madh. Imagjinoni ju po të ishin ato se ç’do bënin mediat e qeverisë duke manipuluar dhe mashtruar shqiptarët. Asnjë fjalë. Dy. Zgjedhjet bashkiake. Një gjuhë e përgjithshme ekzistonte në shkurt.
Në maj kërkohet zbatim në kohë dhe efektiv në prag të zgjedhjeve të të gjitha kërkesave të OSBE/ODIHR.
Pra, në qoftë se ajo ishte me gjuhë të pambuktë, hiqen dorezat dhe i përplasen të gjitha Edi Ramës. Bëhet presion kohor i qartë lidhur me zgjedhjet e ardhshme.
Qeveria nuk besohet më për zgjedhjet.
Tre.
Ndryshimi kapital.
E paimagjinueshme. Nuk ekziston fare në raportin e shkurtit i shkruar me lobingje.
Çfarë thotë raporti IBAR i 21 majit?
Shqipëria duhet të sigurojë garë të barabartë, sepse nuk ka pasur garë të barabartë në zgjedhje, duke marrë masa kundër keqpërdorimit të burimeve shtetërore dhe institucioneve.
E thotë raporti, nuk kishte një fjalë pra, i është shtuar. Duke marrë masa kundër keqpërdorimit të burimeve shtetërore dhe institucioneve.
Dhe më tej godet në mënyrë fatale rrjetet terroriste të patronazhistëve. Sigurisht aty nuk përdoret fjala terroriste, por ja ku e keni, ndikimin e rrjeteve të patronazhimit.
Çka do të thotë se këto rrjete janë bërë famëzeza në BE, në Evropë dhe në botë.
I keni parasysh ju lavdërimet që i bën Edi Rama terroristëve elektorale?
Ja ku i kanë.
Raporti i shkurtit asnjë fjalë.
COELA erdhi në mision faktmbledhës në Shqipëri. Erdhi, i pa gjërat në vend dhe shtoi masat anti-farsë elektorale.
Kjo është hera e parë që BE emëron rrjetet e patronazhimit. Kritikë e drejtpërdrejtë ndaj Edi Ramës dhe qeverisë së tij dhe terroristëve elektoralë anëtarë të këtyre rrjeteve.”, tha Berisha.
Gjithashtu, Berisha akuzoi Edi Ramën se ai është pas dosjeve korruptive të ish-zv/kryeministres, Belinda Balluku.
“COELA thotë se korrupsioni është shqetësim vendimtar, hera e parë që përdoret një term i tillë. Ky qëndrim vjen pasi u zbulua se Rama qëndron pas dosjeve të Lubisë dhe Lindave të tij. Këtu ka një zhvillim tjetër jashtëzakonisht tër rëndësishëm në rekomandime, të cilin nuk e kam hasur kurrë të kësaj force dhe të kësaj natyre. Në raportin e shkurtit thuhet: Korrupsioni mbetet shqetësim serioz. U garantoj se ky term ekziston edhe në raportet e vitit 2011. Shqetësim serioz.
Por jo, nuk e pranon COELA këta. Nuk është punë shqetësimi serioz, se shqetësim serioz mbetet kur luftohet, por duhet të luftohet vazhdimisht. Tani është kaluar në një terminologji krejtësisht tjetër: Korrupsioni shqetësim vendimtar, themelor. Me një fjalë, Shqipëria pothuaj me karton të kuq. Krucial. Nuk e kisha hasur kurrë. Kam hasur terma galopant, pervaziv, por krucial jo. Ky është vlerësimi dhe cilësimi që i ka bërë COELA pas zbulimit se Edi Rama qëndron prapa dosjeve të Lubi Ballukut dhe Lindave të tij. Krucial sinjalizon status afër vijës së kuqe në gjuhën diplomatike.
Pra edhe një përshkallëzim jashtëzakonisht të rëndësishëm. Shikoni çfarë u fshehin qytetarëve mediat e qeverisë. Rezultatet e SPAK. Njohje eksplicite, referencë e përgjithshme ndaj konsolidimit dhe kapaciteteve të SPAK. Jo, pas sulmeve dhe bllokimit të SPAK nga Edi Rama, BE del hapur në mbrojtje të rezultateve, domethënë të padive të paraqitura ndaj Lubi Ballukut dhe zyrtarëve të tjerë të AKSHI-t dhe të rrugëve. Është shtuar: BE mirëpret rezultatet e mira të arritura gjer tani nga SPAK dhe gjykatat e tij përfshi rastet e korrupsionit në nivelet e larta. Besoj se më shqip nuk mund të fliste. Imagjinoni ju se si mund të fshihet ky denoncim. Këtu krijohet një kontrast i qëllimshëm politik midis ndërhyrjeve dhe kritikave të Edi Ramës dhe qëndrimeve të BE.
Është shtuar, nuk ekzistonte. Parlamenti dhe prezumimi i pafajësisë. Asnjë fjalë në shkurt. Deklaratat publike të institucioneve shtetërore mbi hetimet ndaj zyrtarëve aktualë dhe të mëparshëm duhet të respektojnë prezumimin e pafajësisë. Është shtuar kjo. Kjo është kritikë e drejtpërdrejtë ndaj ndërhyrjeve të parlamentit në hetimet e SPAK. Kjo do të thotë se parlamenti nuk mund të ndërhyjë, as të interpretojë, as të bllokojë hetimet e SPAK dhe kërkesat e tij”, tha Berisha.
