Lionel Messi vazhdon të mbajë peng Barcelonën, por kjo nuk e pengon trajnerin e ri Ronald Koeman të nisë revolucionin e tij në skuadër. Tekniku holandez kërkon të rinovojë ekipin dhe në këtë projekt nuk bëjnë pjesë katër prej lojtarëve të rëndësishëm të formacionit katalunjas në vitet e fundit.

Mediat spanjolle bëjnë të ditur se Koeman i ka konfirmuar Luis Suarez, Arturo Vidal, Samuel Umtiti dhe Ivan Rakitic se duhet të largohen për të vazhduar karrierën larg “Camp Nou”.

Këta katër futbollistë janë vetëm të parët e një liste të gjatë të padëshiruarish. Duke qëndruar në atë që raportojnë të përditëshmet iberike, pjesë e saj janë edhe Gerard Piquet, Sergi Roberto apo Jordi Alba. Ndërkohë, pjesa tjetër e skuadrës mbetet në ankth në pritje të telefonatave të Koeman.

Teknikut të ri “blaugrana” I është dhënë dorë e lirë nga klubi, por mënyra e ashpër me të cilën është prezantuar nuk e ndihmon aspak në misionin për të bindur Lionel Messi. Sulmuesi argjentinas ka pranuar se për momentin e sheh veten “më shumë jashtë se brenda projektit” të Koeman. “Pleshti” ka marrë një periudhë pauze, ndërkojë që vlerëson edhe ofertat e tjera, ku sipas mediave angleze, Manchester City ka shtuar përpjekjet për të siguruar shërbimet e gjashtë herë fituesit e “Topit të Artë”.
(balkanweb)