Një qasje e re terapeutike, që synon të trajtojë shkakun e sëmundjeve autoimune dhe jo vetëm simptomat, po tregon rezultate premtuese në studimet klinike ndërkombëtare, sipas “New Scientist”.

Sipas studiuesve te kryera në kolegjin “King’s College” në Londër – të udhëhequr nga imunologu Reuben Benjamin, trajtimi me qeliza të modifikuara gjenetikisht – të njohura si “qeliza CAR T” –  po rezulton efektiv në eliminimin e qelizave imune “të gabuara” që shkaktojnë sëmundje autoimune.

Si funksionon terapia?

Qelizat CAR T krijohen nga qelizat T të vetë pacientit, të cilat zakonisht janë pjesë e sistemit imunitar që lufton infeksionet.

Në këtë terapi, qelizat T nxirren nga trupi i pacientit, modifikohen gjenetikisht në laborator për të njohur dhe sulmuar qeliza specifike problematike dhe më pas rikthehen në organizëm për të eliminuar qelizat që shkaktojnë sëmundjen.

Ndryshe nga trajtimet ekzistuese që vetëm shtypin sistemin imunitar, kjo metodë synon të eliminojë vetë burimin e sëmundjes.

Rezultatet dhe studimet

Sipas imunologut, Reuben Benjamin terapia po jep rezultate “shumë më të mira” krahasuar me trajtimet aktuale dhe ka ngjallur interes të madh në industrinë farmaceutike.

Aktualisht, po zhvillohen dhjetëra prova klinike në mbarë botën, përfshirë qendra kërkimore në Britaninë e Madhe, SHBA dhe Evropë.

Në disa raste të raportuara në studime të hershme, pacientët me forma të rënda të sëmundjeve autoimune, kanë hyrë në remision afatgjatë pas trajtimit.

Perspektiva e trajtimit

Studiuesit theksojnë se, nëse rezultatet konfirmohen në studime më të mëdha, terapitë me qeliza CAR T mund të miratohen në vitet e ardhshme për përdorim klinik.

Megjithatë, ekspertët paralajmërojnë se trajtimi është ende në faza të hershme dhe kërkon më shumë të dhëna për sigurinë afatgjatë dhe efektet anësore.