Një grup aktivistësh të veshur si personazhi legjendar Robin Hood hynë me forcë në një dyqan ushqimor në Montreal të martën në mbrëmje, duke marrë produkte pa paguar dhe duke i shpërndarë ato në frigoriferët e komunitetit të qytetit, në shenjë proteste kundër rritjes së çmimeve të ushqimeve në Kanada. Përgjegjësinë për veprimin e mori një organizatë që e quan veten Robins des Ruelles (“Robinët e Rrugicave”), e cila deklaroi se rreth 60 persona, disa të veshur me kapele që i ngjanin heroit popullor, hynë në një dyqan ushqimor, morën ushqime dhe artikuj të tjerë dhe i shpërndanë ato në disa frigoriferë komunitar në qytet. Sipas grupit, aksioni ishte një “akt politik” që synonte të denonconte pasigurinë ushqimore dhe rritjen e kostos së jetesës.
Incidenti nuk ishte i pari i këtij lloji. Në dhjetor, anëtarë të të njëjtit grup kishin hyrë me forcë në një tjetër dyqan ushqimor në Montreal, të veshur si Babagjyshi dhe elfët, duke marrë produkte ushqimore dhe duke i lënë të mbështjella si “dhurata” nën një pemë Krishtlindjesh aty pranë. Rritja e kostos së jetesës mbetet një shqetësim madhor në Kanada. Sipas të dhënave të raportuara nga rrjeti kanadez CBC, çmimet e ushqimeve u rritën me 4.7 për qind midis nëntorit 2024 dhe 2025, më shumë se dyfishi i normës së përgjithshme të inflacionit.
Në një deklaratë publike, grupi citoi një anëtar me emrin Francis, i cili tha se shumë njerëz punojnë çdo ditë vetëm për të qenë në gjendje të blejnë ushqime nga supermarkete shumë fitimprurëse. Ai shtoi se kur dy vende pune nuk mjaftojnë për të siguruar ushqim, strehim dhe kujdes për familjen, çdo mjet shihet si i justifikueshëm. Një video e publikuar në Instagram nga grupi aktivist Les Soulèvements du Fleuve tregon pamje nga pushtimi i dyqanit Rachelle Béry, ku shihen persona me maska që lëvizin nëpër korridore duke marrë ushqime, ilaçe, produkte higjienike dhe sende të tjera, ndërsa disa mbulojnë kamerat e sigurisë brenda dhe jashtë dyqanit. Në fund të videos, në një mur shkruhet slogani kundër fitimeve të korporatave. Kompania Sobeys, pronare e zinxhirit Rachelle Béry, nuk ka dhënë ende koment për incidentin.
Zëdhënësi i Policisë së Montrealit, Jean-Pierre Brabant, konfirmoi se autoritetet kanë hapur një hetim për vjedhje dhe grafite. Ai tha se nuk ka pasur të lënduar dhe se deri më tani nuk janë kryer arrestime. Vlera e saktë e sendeve të vjedhura nuk dihet ende, por vlerësohet të jetë në mijëra dollarë. Sipas policisë, sendet e marra nuk janë gjetur ende, ndërsa edhe rasti i ngjashëm i ndodhur në dhjetor mbetet nën hetim.
