Në interpelancën e kërkuar me ministren e Infrastrukturës dhe Energjetikës, Belinda Balluku për ecurinë e punimeve në rrugën e Arbrit, deputeti i PD , Xhelal Mziu tha se nuk ka përfunduar as gjysma e rrugës së Arbrit dhe se sipas tij nuk i plotëson standardet.

Mziu ka denoncuar mungesën e punimeve në këtë rrugë, ndërsa u shpreh se ‘Gjoka’ është miku i ministres, duke i kërkuar Ballukut që të futet në websitet e kompanisë dhe shohë çfarë është publikuar për këtë rrugë.

Po ashtu theksoi se pavarësisht mungesës së standardit, rruga po kushtin 5.5 herë më shumë se katër vite më parë.

“19 herë ka pasur deklarata ose të kryeministrit ose të ministrave për fillimin apo mbarimin e punimeve, por rruga ka ngelur rrugëve. Me rrugën e Arbrit sikur u bë një shpikje…Rruga e parë me PPP që do bëhej do të ishte rruga  e Arbrit dhe të ishte hapi i parë i kësaj qeveria me shpikjen e PPP. Kjo rrugë mbetet sërish një ëndërr për dibranët, bulqizakët sepse as gjysma e asaj rrugë nuk është mbaruar…Ajo nuk plotëson edhe kriteret e lidhjes me një qytet”, tha ai duke shtuar: “Rruga jo vetëm që nuk mbaroi brenda afatit por u shty dhe në çdo palë zgjedhje shkonin për të parë punimet…”, theksoi ai, ndërsa shtoi: “Mua më intereson rruga e ngelur rrugëve nga ju ministre. Kam disa dokumente dhe ashtu si ishte futur thelle ne bodrumet e Gjokës unë u futa në website e Gjokës nga ku doli që rruga e përfunduar dhe tregon edhe asfaltin e hedhur…Ju ministre, unë merrem me Ministrinë sepse duhet të bëjë transparencë…Ju sugjeroj të futeni dhe ta kontrolloni… Në kohën e PD ka kushtuar 70 mln euro gjysma e rrugës…Po çfarë standardi ka kjo rrugë që do të kushtojë 5.5 herë më shumë se katër vite. Është Gjoka miku i ministres, që nga 2018 i është dhënë vlera dhe po kjo vlerë brenda tri vitesh do të likuidohej…”

Nga ana e saj ministrja Balluku tha se rruga i ndryshoi jetën qytetarëve të Dibrës.

“U tha se kjo rrugë është shumë e rëndësishme. Por nëse kjo është kaq e rëndësishme se kuptoj përse kërkuesi i interpelancës nuk i ka shtyrë bashkëpartiakët e tij ta bënin këtë rrugë. Kjo rrugë kaq e rëndësishme filloi vetëm kur qeveria analizoi studimet mbi ata që ishin bërë. Tani flet për vende punë, ndërkohë që përfaqëson Dibrën. Unë kohet e fundit jetën politike e zhvilloj në qarkun e Dibrës, dhe ajo që shoh dhe marr nga njerëzit janë se këto punë të bëra në Rrugën e Arbrit ka ndryshuar jetën e qytetarëve. Të vish në foltore dhe të thuash se rrugët kanë mbetur rrugëve nga ata që i lanë rrugëve, ky është një abuzim shumë i madh. Tani zotëria e di që kur vinte në fushatë, vinte dhe kthehej brenda ditës. Sot bujqësia në atë zonë ka lulëzuar edhe për shkak të infrastrukturës, flet për ëndrra dhe thotë Rruga e Arbrit mbeti ëndërr. Jo asgjë nuk mbeti ëndërr në qeverinë Rama. Ëndrrat i keni ju ne kemi detyrë t’jua bëjmë ëndrrat realitet sepse ju konsiderojmë si qytetarë të republikës së Shqipërisë”, tha Balluku.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb