Një këshilltar i lartë i presidentit ukrainas Volodymyr Zelensky ka deklaruar së fundmi se Rusia e ka kthyer Khersonin në një “qytet vdekjeje” pasi ka plaçkitur gjithçka dhe planifikon ta granatojë atë sapo trupat ukrainase të ndërhyjnë në të.
Mykhailo Podolyak lëshoi paralajmërimin disa orë pasi Moska tha se do të tërhiqte trupat nga Kherson në bregun lindor të lumit Dnipro, duke i dhënë Ukrainës një nga përparimet më të mëdha që nga nisja e agresionit në shkurt.
“Federata Ruse dëshiron ta kthejë Khersonin në një “qytet të vdekjes”, tha Podolyak të enjten. “Ushtria ruse shkatërron gjithçka që mundet; apartamente, kanalizime. Artileria në bregun e majtë planifikon ta kthejë qytetin në gërmadhë”, u shpreh ai.
Gjenerali Valerii Zaluzhnyi, komandanti kryesor i ushtrisë së Ukrainës, tha se njerëzit e tij kanë filluar të lëvizin drejt qytetit dhe kanë avancuar katër milje në dy drejtime dhe kanë kapur rreth 12 fshatra në 24 orët e fundit, ndërsa shtoi se ai nuk është në gjendje të konfirmojë ose mohojë nëse tërheqja e rusëve është e vërtetë.
(BalkanWeb)
