Ministria e Jashtme ruse tha të hënën se Rusia nuk e konsideron më veten të detyruar nga një moratorium mbi vendosjen e raketave me rreze të shkurtër dhe të mesme veprimi.

SHBA-të u tërhoqën nga traktati i Forcave Bërthamore me Rreze të Mesme Veprimi në vitin 2019. Rusia ka thënë që atëherë se nuk do të vendoste armë të tilla me kusht që Uashingtoni të mos e bënte këtë.

Megjithatë, Ministri i Jashtëm Sergei Lavrov sinjalizoi dhjetorin e kaluar se Moska do të duhej t’i përgjigjej asaj që ai e quajti “veprime destabilizuese” nga SHBA-të dhe NATO-ja në sferën strategjike.

“Meqenëse situata po zhvillohet drejt vendosjes aktuale të raketave me rreze të mesme dhe të shkurtër veprimi të prodhuara në SHBA në Evropë dhe rajonin e Azi-Paqësorit, ministria e jashtme ruse vëren se kushtet për ruajtjen e një moratoriumi të njëanshëm për vendosjen e armëve të ngjashme janë zhdukur”, tha ministria në deklaratën e saj.

 

(A.A/BalkanWeb)