Aleatët e Ukrainës të cilët u takuan  në Bruksel, kanë premtuar tashmë 35 miliardë dollarë ndihmë ushtarake për Kievin këtë vit, tha Sekretari Britanik i Mbrojtjes, John Healy .

Shuma përfshin angazhime të reja dypalëshe, si dhe premtime të mëparshme nga aleatët e Ukrainës, të tilla si 11.5 miliardë eurot e shpallura nga Gjermania, tha një diplomat i NATO-s.

“Ne do të rrisim ndihmën ushtarake për Ukrainën. Do të rrisim presionin mbi Rusinë”, tha Healy pas një takimi të Grupit të Kontaktit midis Ukrainës dhe aleatëve të saj në Bruksel.

Në vitin 2025, ky grup mblodhi rreth 45 miliardë dollarë ndihmë ushtarake për Ukrainën dhe “në vitin 2026 duhet të bëjmë më mirë, të bëjmë më shumë”, theksoi ministri britanik.

Homologu i tij gjerman Boris Pistorius njoftoi nga ana e tij se Berlini do të dorëzonte pesë sisteme të reja të përparuara kundërajrore me rreze të gjatë veprimi, të tipit PAC-3, për mbrojtjen ajrore të Ukrainës. Ai u bëri thirrje vendeve të tjera të dërgonin të paktën tridhjetë sisteme të tilla.

“Ne të gjithë e dimë se qëllimi është të shpëtojmë jetë”, u tha Pistorius gazetarëve, i shoqëruar nga Ministri ukrainas i Mbrojtjes, Mykhailo Fedorov.

Sulmet masive ruse ndaj rrjetit energjetik të Ukrainës kanë ndërprerë energjinë elektrike dhe ngrohjen në zona të mëdha të vendit në mes të dimrit. “Kjo thjesht po terrorizon popullsinë civile”, tha Pistorius, duke thënë se Rusia po e përdor dimrin “si armë kundër grave, fëmijëve dhe burrave të pafajshëm”.

“Rusët nuk mund të na mposhtin në terren, prandaj po bëjnë luftë kundër infrastrukturës sonë kritike”, komentoi Fedorov.

Gjermania dhe Britania bashkëkryesojnë Grupin e Kontaktit, i cili më parë drejtohej nga SHBA-të.