Sekretari i Luftës i SHBA-së, Pete Hegseth, njoftoi sot gjatë një konference për shtyp në Pentagon një valë bombardimesh gjithëpërfshirëse kundër Iranit, duke i quajtur “më intensive që nga fillimi i konfliktit”. “Sot do të jetë dita më intensive e sulmeve ndaj Iranit. Më shumë luftëtarë, më shumë bombardues, më shumë sulme. Informacioni është më i saktë dhe më i mirë se kurrë,” tha Hegseth, duke theksuar se Irani ka lëshuar numrin më të vogël të raketave që nga fillimi i luftës.
Objektivat kryesore të operacioneve mbeten të njëjtat: shkatërrimi i rezervave dhe lançuesve të raketave, shkatërrimi i bazës industriale të mbrojtjes iraniane, neutralizimi i marinës dhe pengimi i zhvillimit të armëve bërthamore.
Hegseth theksoi se forcat amerikane po “shkatërrojnë armikun pa pushim” dhe se Irani po “sulmon qëllimisht të pafajshmit” sepse e di se forcat e tij “po degradohen dhe shkatërrohen sistematikisht”. “Irani është i vetëm dhe po humbet keq,” shtoi ai.
Sekretari i Luftës gjithashtu iu referua përvojës së tij personale dhe sakrificës së trupave amerikanë, duke theksuar se SHBA nuk është “në vitin 2003” dhe nuk do të lejojë ndonjë “ndërtim kombi pa fund” si në Irak. Ai vuri në dukje “efikasitetin brutal” dhe “dominimin e plotë ajror” të forcave amerikane në këtë konflikt.
“Ne mbetemi të përqendruar te qëllimi sepse kjo është puna jonë,” tha Hegseth, duke theksuar se çdo humbje e trupave amerikanë ka rëndësi të jashtëzakonshme për vendosmërinë e SHBA-së në luftë.
