Shtetet e Bashkuara nisën një valë të re sulmesh ushtarake ndaj objektivave në Iran të mërkurën , për të dytën ditë radhazi, duke përshkallëzuar më tej konfrontimin midis dy vendeve. Komanda Qendrore e SHBA-së (CENTCOM) njoftoi se operacionet po kryhen në përgjigje të “agresionit të vazhdueshëm dhe të paprovokuar” të Teheranit.
Sipas përditësimit zyrtar të CENTCOM, sulmet e reja filluan në orën 17:15, pas urdhrit të Presidentit Donald Trump .
“Forcat e Komandës Qendrore të SHBA-së kanë nisur sulme shtesë mbrojtëse kundër objektivave të shumta në Iran në drejtim të Komandantit të Përgjithshëm. Sulmet janë në përgjigje të agresionit të vazhdueshëm dhe të paprovokuar të Iranit”, thuhet në deklaratë.
Ushtria amerikane nuk dha detaje të mëtejshme rreth objektivave të goditura ose rezultateve të operacioneve.
Televizioni shtetëror iranian raportoi se tre shpërthime u dëgjuan në Sirik, Ishullin Kish dhe Minab. Këto zona ndodhen përgjatë bregdetit jugor të Gjirit Persik të Iranit, ku ka poste ushtarake dhe detare. Banorët e Teheranit thanë se dëgjuan sirena të mbrojtjes ajrore nga pjesa perëndimore e kompleksit qeveritar.
Në të njëjtën kohë, një zyrtar i lartë amerikan informoi se objektivat që po sulmohen ndodhen në Iranin jugor dhe përfshijnë sisteme të mbrojtjes ajrore, radarë, si dhe njësi komande dhe kontrolli për avionë pa pilot.
Sipas Axios, SHBA-të kryen sulmet me qëllim rritjen e presionit mbi Teheranin për të nënshkruar një marrëveshje.
Orë para se të njoftoheshin sulmet e reja, Donald Trump kishte kërcënuar me veprime të mëtejshme ushtarake kundër Teheranit.
Duke folur nga Zyra Ovale, presidenti amerikan tha se negociatat me Iranin nuk kishin sjellë përparimin që Uashingtoni kishte shpresuar.
“Ne do t’i godasim ata, do t’i godasim shumë fort”, tha ai.
Ai argumentoi gjithashtu se rrëzimi i një helikopteri amerikan Apache pranë Ngushticës së Hormuzit të hënën ishte arsye e mjaftueshme për të rinisur sulmet.
“Bazuar në helikopter, besoj se kemi të drejtë ta bëjmë këtë”, u tha ai gazetarëve.
Sekretari i Mbrojtjes i SHBA-së, Pete Hegseth, gjithashtu mbajti të njëjtin ton , duke paralajmëruar se Uashingtoni ishte i përgatitur të përshkallëzonte më tej operacionet nëse Teherani nuk arrinte një marrëveshje.
Duke folur jashtë selisë së CENTCOM në Tampa të Floridës, ai tha se forcat amerikane mund të godisnin “objektet kyçe” në Iran.
“Komanda Qendrore do të ketë shumë punë sonte sepse Presidenti Trump tha se do ta godasim fort Iranin dhe do ta godasim fort Iranin”, tha ai.
Hegseth argumentoi se udhëheqja iraniane ka ende aftësinë për të shmangur përshkallëzimin e mëtejshëm përmes një marrëveshjeje me Shtetet e Bashkuara, por paralajmëroi se përndryshe do të pasonin goditje të reja.
Nga ana e Teheranit, përfaqësuesi i përhershëm i Iranit në Kombet e Bashkuara, Amir Saeed Iravani, i hodhi poshtë kërcënimet amerikane dhe i bëri thirrje Uashingtonit të heqë dorë nga presioni ushtarak.
Duke folur para Këshillit të Sigurimit të OKB-së, ai theksoi se “asnjë marrëveshje e qëndrueshme nuk mund të arrihet përmes kërcënimeve, frikësimit ose përdorimit të forcës”.
Në të njëjtën kohë, ai i bëri thirrje Donald Trump të ndalojë kërcënimet e tij të përsëritura për të përdorur forcën ushtarake kundër vendit të tij, duke argumentuar se zgjidhja e krizës mund të arrihet vetëm përmes dialogut dhe diplomacisë.
