SHBA po intensifikon përpjekjet për t’i dhënë fund luftës në Ukrainë, por shanset për sukses mbeten të paqarta, pasi zëvendëspresidenti amerikan deklaroi se vendi i tij do të largohet nëse Ukraina dhe Rusia nuk bien dakord për propozimet.

Zëvendëspresidenti i SHBA-së, JD Vance, tha se vendi i tij do të “largohet” nga bisedimet nëse Ukraina dhe Rusia nuk merren vesh, duke i bërë jehonë komenteve të fundit nga zyrtarët amerikanë.

Paralajmërimi i tij erdhi pasi bisedimet në Londër mes zyrtarëve nga Mbretëria e Bashkuar, Franca, Gjermania, Ukraina dhe SHBA-ja që synonin të siguronin një armëpushim u zbehën pasi sekretari i Shtetit i SHBA-së, Marco Rubio, dhe i dërguari special, Steve Witkoff, u tërhoqën.

SHBA-ja është fokusuar në bisedimet këtë javë në Moskë, ku Witkoff do të takohet me presidentin rus, Vladimir Putin, për herë të katërt, teksa ritmi i diplomacisë për t’i dhënë fund luftës është duke u përshpejtuar.

Presidenti i Ukrainës, Volodymyr Zelensky, ndërkohë, ka thënë se ai këmbënguli për “një armëpushim të menjëhershëm, të plotë dhe të pakushtëzuar”.

Vërejtjet e tij vijnë pasi Vance u tha gazetarëve, gjatë vizitës në Indi, se SHBA-ja kishte lëshuar një “propozim shumë të qartë” si për rusët, ashtu edhe për ukrainasit.

“Është koha që ata ose të thonë po, ose SHBA të largohet nga ky proces,” shtoi ai. “Ne jemi angazhuar në një sasi të jashtëzakonshme të diplomacisë dhe punës në terren.”

(BalkanWeb)