Ushtria amerikane ka kryer sulme ndaj disa objektivave ushtarake iraniane, pasi presidenti Donald Trump akuzoi Iranin për shkelje të armëpushimit pas një sulmi me dron ndaj një anijeje mallrash në Ngushticën e Hormuzit.
Sipas Komandës Qendrore të SHBA-së (CENTCOM), sulmet amerikane shënjestruan depo raketash dhe dronësh, si edhe pozicione radarësh bregdetarë. Uashingtoni tha se veprimi ishte përgjigje ndaj sulmit të së enjtes ndaj një anijeje tregtare, incident që pengoi edhe evakuimin e planifikuar të marinarëve të bllokuar në rajon.
Në një deklaratë, CENTCOM e cilësoi operacionin si “një përgjigje të fuqishme”, duke akuzuar Iranin se me sulmin ndaj anijeve tregtare ka shkelur armëpushimin dhe ka rrezikuar lirinë e lundrimit në një nga korridoret më të rëndësishme të tregtisë ndërkombëtare.
Nga ana tjetër, autoritetet iraniane thanë se anija e mallrave ishte sulmuar pasi po përdorte një rrugë të paautorizuar për të kaluar në Ngushticën e Hormuzit. Ministria e Jashtme e Iranit akuzoi SHBA-në për shkelje të marrëveshjes së përkohshme mes palëve dhe njoftoi se forcat iraniane kishin goditur objektiva të lidhura me ushtrinë amerikane.
Edhe Korpusi i Gardës Revolucionare Islamike (IRGC) deklaroi se marina e tij kishte ndërmarrë sulme ndaj pozicioneve ushtarake amerikane në rajon, pa dhënë detaje të mëtejshme.
Ndërkohë, Ministria e Jashtme e Bahreinit bëri të ditur se vendi ishte shënjestruar nga disa dronë iranianë, duke e cilësuar incidentin si një shkelje të rëndë të sovranitetit dhe duke akuzuar Teheranin për minimin e përpjekjeve për paqe.
Po ashtu, Operacionet e Tregtisë Detare të Mbretërisë së Bashkuar raportuan se një anije cisternë u godit nga një predhë e paidentifikuar në Ngushticën e Hormuzit. Sipas autoriteteve britanike, anija pësoi dëmtime në urë, por i gjithë ekuipazhi është i sigurt dhe nuk janë raportuar ndotje mjedisore.
Përshkallëzimi i fundit i tensioneve rrit shqetësimet për sigurinë në një nga rrugët detare më të rëndësishme për tregtinë globale dhe furnizimin me energji.
