SHBA -të kanë “dëmtuar ose shkatërruar më shumë se dy të tretat” e kapaciteteve të Iranit për prodhimin e dronëve dhe raketave, si dhe të kantiereve të tij detare, tha një zyrtar i lartë amerikan të mërkurën.

“Deri më sot, ne kemi dëmtuar ose shkatërruar më shumë se dy të tretat e objekteve dhe kantiereve detare të Iranit për prodhimin e dronëve dhe raketave, dhe ende nuk kemi mbaruar”, tha për X Admirali Brad Cooper, kreu i Shtabit të Përbashkët të SHBA-së për Lindjen e Mesme ( CENTCOM ).

Ai tha gjithashtu se SHBA-të kishin shkatërruar “92%” të flotës iraniane. Teherani ka “humbur aftësinë për të projektuar… fuqinë dhe ndikimin e tij detar në rajon dhe në mbarë botën”, tha ai.

Raketat balistike dhe mjetet ajrore pa pilot të lëshuara nga Irani janë në rënie të ndjeshme, tha oficeri i lartë, duke shtuar se SHBA-të kontrollojnë “hapësirën ajrore” të Republikës Islamike.

Ndërkohë, Komanda Qendrore tha se aeroplanmbajtësja USS Abraham Lincoln vazhdon “operacionet e fluturimit kundër objektivave ushtarake në Iran ndërsa lundron në ujërat rajonale”.

Deklarata vjen pasi ushtria iraniane njoftoi se kishte qëlluar me raketa lundrimi aeroplanmbajtësen, duke e detyruar atë të ripozicionohej në ujërat rajonale.

SHBA-të dhe Izraeli nisën një fushatë masive ajrore kundër Iranit pothuajse një muaj më parë, më 28 shkurt, duke synuar udhëheqësit e tij politikë dhe ushtarakë dhe infrastrukturën ushtarake. Që atëherë, ushtria amerikane ka goditur më shumë se 10,000 objektiva, sipas Admiral Cooper.