Shtetet e Bashkuara njoftuan të enjten se kanë miratuar shitjen e bombave me vlerë 2.68 miliardë dollarë Kanadasë , pavarësisht tensioneve tregtare midis dy fqinjëve.
Kontrata përfshin shitjen e mijëra bombave të llojeve të ndryshme, duke përfshirë 3,414 bomba BLU-111, me peshë 225 kilogramë secila, 3,100 bomba precize GBU-39, si dhe bomba që depërtojnë blindazhin, sipas një deklarate nga Agjencia e Bashkëpunimit për Sigurinë e Mbrojtjes (DSCA), e cila tha se Kongresi u njoftua për transaksionin, siç kërkohet nga ligji amerikan.
Kontraktorët kryesorë janë Boeing dhe RTX Corporation (më parë Raytheon Technologies).
Shitja “do të rrisë aftësitë ushtarake të një aleati të NATO-s … dhe aftësinë mbrojtëse të besueshme të Kanadasë për të penguar çdo sulm”, sipas njoftimit për shtyp.
Kryeministri kanadez Mark Carney njoftoi në qershor se vendi i tij do t’i kushtonte 2% të PBB-së mbrojtjes këtë vit, me qëllim përmbushjen e qëllimit të vendosur nga NATO, “gjysmë dekade përpara afatit” për këtë, për shkak të “kërcënimeve në rritje”.
Ai tha gjithashtu se Ottawa do të përpiqet të zvogëlojë varësinë e saj nga Shtetet e Bashkuara për pajisje ushtarake, duke shtuar se sjellja e re e Uashingtonit në nivel ndërkombëtar ka pasoja.
Që kur u rikthye në presidencën e SHBA-së në janar, Donald Trump ka folur me përçmim për Kanadanë, ka argumentuar vazhdimisht se fqinji verior i SHBA-së duhet të bëhet shteti i saj i 51-të dhe ka nisur një luftë tregtare kundër saj, duke zbatuar një sërë tarifash shtesë doganore.
