Departamenti Amerikan i Drejtësisë ka bërë publike aktakuzat ndaj pesë personave, të cilët dyshohet se kanë vepruar në kuadër të një rrjeti të lidhur me shërbimet ruse të inteligjencës, me synim organizimin e vrasjeve dhe sulmeve në Shtetet e Bashkuara dhe në Evropë. Sipas autoriteteve amerikane, të pesë të pandehurit janë aktualisht në arrati. Sipas aktakuzës, që prej të paktën vitit 2024, i ashtuquajturi “RIS Network” ka planifikuar dhe kryer sulme jashtë Rusisë, duke u fokusuar fillimisht te disidentët dhe dezertorët rusë dhe më pas te vende të konsideruara aleate të Ukrainës. Autoritetet amerikane pretendojnë se anëtarët e rrjetit kanë paguar ose janë përpjekur të paguajnë persona në SHBA dhe vende të tjera për të kryer vëzhgime paraprake dhe vrasje të synuara, si dhe kanë rekrutuar bashkëpunëtorë për sulme ndaj infrastrukturës civile dhe ushtarake në Evropë.
Tre nga të pandehurit konsiderohen nga autoritetet amerikane si anëtarë të nivelit të lartë të këtij rrjeti: Yuri Khrameev, ish-kolonel i shërbimeve ruse të inteligjencës; Kirill Khrameev, oficer i Shërbimit Federal të Sigurisë ruse (FSB) dhe djali i Yuri Khrameev; si dhe Oemis Romagoza Durruthy, shtetas kuban që, sipas aktakuzës, koordinonte sulme, udhëtime dhe logjistikë për rrjetin. Dy të tjerët janë Yaidel Delgado Suarez, i njohur si “Viking”, dhe Angel Eduardo Castro. Një nga rastet e përshkruara në aktakuzë lidhet me përpjekjen për të rekrutuar një person në SHBA për të survejuar dhe vrarë një disident rus që jetonte në vend. Sipas prokurorëve, Suarez dhe Castro i ofruan personit të rekrutuar 40 mijë dollarë për ta “eliminuar” ose zhdukur objektivin, ndërsa më herët i kishin paguar para për të fotografuar dhe filmuar vendndodhje të lidhura me të.
Aktakuza përmend gjithashtu një rast në Lituani, ku Yuri dhe Kirill Khrameev dyshohet se kërkuan fillimisht mbikëqyrjen e një personi dhe më pas vrasjen e tij. Sipas Departamentit të Drejtësisë, Yuri Khrameev i ofroi një shtetasi amerikan rreth 25 mijë dollarë për kryerjen e vrasjes, pasi e kishte përshkruar viktimën si person që “fliste keq për Rusinë” dhe “shtrembëronte historinë”.
Autoritetet amerikane pretendojnë gjithashtu se Durruthy ka koordinuar sulme në Pragë dhe Lituani gjatë vitit 2024, duke siguruar udhëtime, kontakte dhe informacion për objektivat e mundshëm. Të pesë të pandehurit akuzohen për komplot për financimin e terrorizmit, ndërsa tre prej tyre përballen edhe me akuzën e komplotit për vrasje me pagesë. Zëvendësprokurori i Përgjithshëm për Sigurinë Kombëtare, John A. Eisenberg, tha se të pandehurit dyshohet se vepronin si pjesë e një rrjeti global vrasjesh që kishte shtrirë aktivitetin edhe në SHBA. Departamenti i Drejtësisë theksoi se FBI-ja ka ndërhyrë për të penguar planet e dyshuara. Departamenti i Drejtësisë nënvizon se aktakuza përmban vetëm akuza dhe se të gjithë të pandehurit konsiderohen të pafajshëm derisa fajësia e tyre të provohet në gjykatë.
