Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, ka mbështetur idenë e kryeministrit spanjoll Pedro Sanchez për mbrojtjen e të rinjve nga “universi toksik” i mediave sociale dhe ka bërë thirrje për vendosjen e kufizimeve të moshës për ta.

Drejtori i Përgjithshëm i OBSH-së e shkroi këtë në llogarinë e tij në rrjetin social “X”.

“Platformat duhet të projektohen dhe të operohen në një mënyrë që mbron sigurinë dhe shëndetin e fëmijëve”, shkroi shefi i OBSH-së në mediat sociale. Ai shtoi se kjo kërkon, ndër të tjera, zbatimin e kufizimeve realiste të moshës.

Ghebreyesus u pajtua me kryeministrin spanjoll dhe shtoi se rregullimi dhe llogaridhënia e mediave sociale janë me rëndësi të madhe. Sipas kreut të OBSH-së, provat tregojnë se dëmi ndaj fëmijëve nuk lidhet vetëm me përdorimin e mediave sociale, por edhe me mënyrën se si janë hartuar ato. Në këtë drejtim, ai bëri thirrje gjithashtu për luftimin e dizajnit të dëmshëm dhe varësisë së mediave sociale dhe nënshtrimin e tyre ndaj mbikëqyrjes së pavarur.