Sekretari i Përgjithshëm i Kombeve të Bashkuara, Antonio Guterres, bëri thirrje të hënën për një armëpushim të menjëhershëm në Gaza, duke kërkuar që ai të pasohet nga një zgjidhje politike e bazuar në Kartën e OKB-së, të drejtën ndërkombëtare dhe rezolutat përkatëse të OKB-së.

“Ajo që po dëshmojmë në Gaza është një nivel i paparë vdekjesh dhe shkatërrimesh në kohët e fundit”, u tha Guterres gazetarëve në selinë e OKB-së. “Kjo po dëmton bazat e dinjitetit njerëzor për popullin e Gazës”, tha ai, duke e përshkruar situatën si “të tmerrshme”.

Guterres shprehu shpresën se palët e përfshira do të jenë në gjendje të kapërcejnë sfidat aktuale për të arritur një armëpushim, por theksoi se ndalimi i dhunës vetëm nuk do të ishte i mjaftueshëm. “Një armëpushim duhet të çojë në një zgjidhje”, tha ai.

Ai theksoi se paqja do të ishte e mundur vetëm nëse si palestinezët ashtu edhe izraelitët do të ishin në gjendje të jetonin në shtete ku mund të ushtronin plotësisht të drejtat e tyre.

Guterres tha se kjo është arsyeja pse OKB-ja po thërret një konferencë më vonë këtë muaj mbi zgjidhjen me dy shtete. “Realiteti i pesë milionë njerëzve që jetojnë në atdheun e tyre pa të drejta është një kundërshtim i hapur i parimeve të njerëzimit dhe dispozitave të së drejtës ndërkombëtare”, tha ai.