Një konflikt i ndodhur mbrëmjen e së enjtes në zonën e lodrave në Shëngjin ka përfunduar me një person të plagosur.

Sipas informacioneve paraprake, gjatë përleshjes një person është goditur me tytën e një pistolete zhurmuese, duke mbetur i dëmtuar. Ai është transportuar me urgjencë drejt Spitalit Rajonal të Lezhës, ku po merr trajtim mjekësor. Burime bëjnë me dije se gjendja e tij është jashtë rrezikut për jetën.

Pas incidentit, uniformat blu kanë shoqëruar një person të dyshuar, ndërsa vijojnë hetimet për zbardhjen e plotë të dinamikës së ngjarjes dhe shkaqeve që çuan në konflikt.

Në vendngjarje është sekuestruar edhe pistoleta zhurmuese, e cila dyshohet se është përdorur gjatë përplasjes.

Ngjarja është regjistruar rreth orës 20:30, ndërsa policia po punon për dokumentimin e plotë të rastit dhe përcaktimin e përgjegjësive të personave të përfshirë.

Njoftimi

Rreth orës 21:30, në zonën e lodrave, në Shëngjin, gjatë një konflikti me sende të forta mes dy shtetasve, ka mbetur i dëmtuar shtetasi M. P., i cili është transportuar në Spitalin Rajonal Lezhë dhe ndodhet jashtë rrezikut për jetën.

Menjëherë pas marrjes së njoftimit, shërbimet e Policisë kanë shkuar në vendngjarje, ku kanë bërë të mundur shoqërimin e autorit të dyshuar, shtetasit A. Ll. Gjatë veprimeve të para hetimore është gjetur dhe sekuestruar, në cilësinë e provës materiale, një armë sportive zhurmuese, e cila dyshohet se mbahej prej tij.

Grupi hetimor ndodhet në vendngjarje dhe, nën drejtimin e Prokurorisë, po kryen veprimet procedurale për sqarimin e plotë dhe dokumentimin ligjor të rrethanave të ngjarjes.