Raundi i dytë i bisedimeve trepalëshe midis delegacioneve ruse, ukrainase dhe amerikane do të zhvillohet në Abu Dhabi më vonë këtë javë, tha sekretari i shtypit i Kremlinit, Dmitry Peskov. Ai përmendi problemet e axhendës si arsye për shtyrjen e bisedimeve, të cilat ishin planifikuar për të dielën.
Presidenti ukrainas Volodymyyr Zelensky tha të dielën se takimi në kryeqytetin e Emirateve të Bashkuara Arabe ishte riplanifikuar për 4 dhe 5 shkurt.
Peskov u tha gazetarëve të hënën se “negociatat në Abu Dhabi ishin planifikuar vërtet për të dielën, por kërkohej koordinim shtesë i orareve të të tre palëve”.
Raundi i dytë i bisedimeve trepalëshe do të mbahet të mërkurën dhe të enjten, tha ai. “Ne mund ta konfirmojmë këtë.”
Raundi fillestar i negociatave trepalëshe, i mbajtur në Abu Dhabi më 23 dhe 24 janar, shënoi herën e parë që përfaqësuesit nga Moska, Kievi dhe Uashingtoni u ulën së bashku që nga nisja e agresionit rus në Ukrainë në shkurt 2022. Pavarësisht se takimi u përshkrua si “konstruktiv”, ai nuk arriti të prodhonte ndonjë marrëveshje konkrete.
Sekretari i Shtetit i SHBA-së, Marco Rubio, tha se çështjet territoriale mbeten “një urë që nuk e kemi kaluar ende”, duke shtuar se “po punohet aktivisht për të parë nëse pikëpamjet e të dyja palëve mbi këtë çështje mund të pajtohen”.
Moska këmbëngul se çdo zgjidhje duhet të përfshijë tërheqjen e Ukrainës nga rajonet e Donbasit dhe njohjen e kufijve të rinj të vendit, përfshirë Krimenë. Zelensky ka thënë vazhdimisht se “nën asnjë rrethanë” Kievi nuk do të bjerë dakord për ndonjë lëshim territorial.
Shtyrja e bisedimeve në Abu Dhabi pasoi një udhëtim të papritur në Florida të shtunën nga i dërguari presidencial rus Kirill Dmitriev, ku ai u takua me të dërguarin amerikan Steve Witkoff, Sekretarin e Thesarit Scott Bessent, dhëndrin e Presidentit Donald Trump, Jared Kushner, dhe Këshilltarin e Lartë të Shtëpisë së Bardhë, Josh Gruenbaum.
