TIRANË

Deputeti socialist Paulin Stërkaj ka folur pas mbylljes së seancës plenare për deklaratat e ish-deputetit të LSI-së Petrit Vasili por jo vetëm.

Stërkaj tha se nuk janë ende ish-deputetë pasi deklaratat e dorëheqjes i kanë bërë për të mos ikur nga parlamenti. Ai tha se ka telefonuar Vasilin dhe se nëse  i ndodh ndonjë gjë ndonjë deputeti mban përgjegjësi.

“Turma gjithmonë kur del në shesh për zi të bukës thonë francezët djeg furrën e bukës të parën sepse ai mendon se e ka furra por realisht nuk ka brumë, nuk ka miell, nuk ka dru. Është papërgjegjshme dhe unë ju bëj thirrje gjithë ish-kolegëve, se ashtu thonë ish por deklaratat i kanë bërë për të mos ikur nga parlamenti, i kanë bërë false, i kanë bërë jashtë ligjit që mos t’i bëjnë thirrje kujt që të cenojnë individë parlamentarë. Sepse çdo individ parlamentar siç kanë këta popullin që i shoqëron kanë dhe parlamentarët popullin që e shoqëron, pra nëse do i përgjigjemi me popull, kjo është anarshi. Por ne mendojmë që të zbatojmë veç ligjin, të ndjekim veç ligjin dhe i bëj thirrje gjithë kolegëve deputetë nuk është normale të bëhen thirrje siç ka bërë Petrit Vasili, bile e mora në telefon po ju them të sinqertë që po qe se i ndodh ndonjë gjë ndonjë deputeti do e kërkojmë tek ai apo tek ndonjë deputet tjetër se nuk i kam ndjekur të gjithë që kërkojnë të sulmohen deputetë që janë përfaqësues të popullit. Kaq kisha”, tha Stërkaj.

Si do vijojë situata zoti Stërkaj?
Situata do vijë si është më mirë. S’ka ku shkon. Kjo është një situatë e paprecedentë. Kjo nuk ka ndodhur kurrkund. Në asnjë vend të botës nuk ka ndodhur. Kam frikë se do ndodhë në Gjermani, do i kopjojnë deputetët gjermanë që janë në opozitë do kopjojnë opozitën shqiptare do i thonë që të ikë Merkeli e të vijë një qeveri tjetër. Pra kjo nuk ka ndodhur ndonjëherë, kjo nuk ka precedentë.

Unë vij nga radhët e policisë, i bëj thirrje dhe ministrit të brendshëm dhe drejtorit të përgjithshëm të policisë që policinë mos ta nxjerrin pa mjete intervenimi. Jo policët me uniformë civile përballë protestuesve por policët të jenë të veshur me të gjitha pajisjet e sulmit të turmave që e thyejnë ligjin, e destabilizojnë vendin.

DEKLARATA E VASILIT NË PROTESTË
Gjatë protestës Vasili tha se deputetët i janë fshehur popullit, duke i krahasuar me minjtë.
“Vëllezër dhe motra këtu është populli. Këtu janë djemtë e popullit. Këtu janë vajzat e popullit. Atje janë minjtë, minjtë janë futur në vrimë, kanë hyrë si minj dhe duan të dalin si minj, po i presim. Çfarë do të bëjnë? Do të flenë aty? Këtu do të kalojnë, por këtu nuk do të kalojnë dot sepse këtu është populli. Këta i janë fshehur popullit dhe rrinë të fshehur mbas fustanit të Gramoz Ruçit. As tek fustani i Gramoz Ruçit dhe as tek brekushet e Edi Ramës nuk i shpëton dot njeri. As brekushet e Edi Ramës ashtu me erë siç janë. Siç e dini, sot është dita ku populli do të thotë fjalën e tij dhe do të pastrojë Parlamentin nga ata minj që e kanë qelbur dhe e kanë ndyrë. Aty do të jetë vendit i fjalës së lirë, vendi i fjalës së popullit dhe jo vendi i atyre që e bën pis atë Parlament. Këtu do rrimë pa u kthyer mbrapa, ju kam thënë asnjë hap pas derisa Edi Rama të ikë, të shporret. Edi shporru. Edi Shporru”, tha Vasili.

(m.k/BalkanWeb)