Në ceremoninë e diplomimit të studentëve të Universitetit “Luarasi”, Presidentja Fabiola Hysenbelliu mbajti një fjalë motivuese për të diplomuarit, duke e cilësuar këtë ditë si një moment të veçantë jo vetëm për studentët, por edhe për stafin akademik.
Ajo theksoi se të diplomuarit po mbyllin një kapitull të rëndësishëm, ndërsa hapin dyert drejt mundësive dhe sfidave të reja, të pajisur me njohuri, aftësi dhe vlera që universiteti u ka dhënë ndër vite.
Hysenbelliu u ndal te roli i familjarëve, pedagogëve dhe stafit të universitetit në këtë rrugëtim, duke i falënderuar për mbështetjen dhe përkushtimin e tyre.
Në mesazhin e saj, ajo i inkurajoi studentët të mos ndalen së mësuari, të guxojnë dhe të ndërtojnë të ardhmen me integritet, duke i quajtur ambasadorë të vlerave të “Luarasit” në botë.
Presidentja e Universitetit “Luarasi”, Fabiola Hysenbelliu njoftoi gjithashtu mundësinë që të diplomuarit të aplikojnë vitin e ardhshëm për një master ekzekutiv në London School of Economics, falë partneritetit të ri mes LSE dhe “Luarasit”.
Fjala e Presidentes së Universitetit “Luarasi”, Fabiola Hysenbelliu
Të nderuar të diplomuar, prindër, profesorë, staf akademik dhe të ftuar të respektuar,
Sot është një ditë që mbart një emocion të veçantë për të gjithë ne. Jemi mbledhur për të festuar arritjet tuaja, për të nderuar punën, pasionin dhe përkushtimin që keni treguar gjatë viteve të studimit. Për mua, si President i Universitetit, është një privilegj i madh të jem para jush në këtë ditë kaq domethënëse.
Të dashur të diplomuar,
Ju sot mbyllni një kapitull të rëndësishëm të jetës suaj, por njëherazi hapni dyert drejt mundësive të reja, sfidave të reja dhe horizonteve më të gjera. Gjatë qëndrimit tuaj në këtë universitet, keni fituar jo vetëm njohuri akademike, por edhe përvojë, miqësi, vlera dhe aftësi që do t’ju shoqërojnë në çdo hap të së ardhmes.
Keni mësuar të mendoni kritikisht, të zgjidhni probleme, të punoni në ekip, dhe mbi të gjitha, të mos hiqni dorë përballë vështirësive. Këto cilësi janë po aq të vlefshme sa vetë diploma që merrni sot.
Asnjëri prej jush nuk ka ecur vetëm në këtë udhëtim. Sot, një pjesë e meritës u takon edhe prindërve dhe familjarëve tuaj që ju kanë mbështetur në çdo hap; profesorëve që kanë besuar tek ju dhe ju kanë udhëhequr me përkushtim; stafit të universitetit që ka punuar çdo ditë për të krijuar një mjedis të shëndetshëm akademik. Të gjithë meritojnë mirënjohjen tonë më të thellë.
Të dashur të diplomuar,
Bota që po hyni është dinamike, shpesh sfiduese, por plot mundësi për këdo që është i gatshëm të guxojë dhe të angazhohet. Pavarësisht rrugës që zgjidhni — qoftë studime të mëtejshme, një karrierë profesionale, apo ndërmarrje personale — mos harroni se suksesi ndërtohet me integritet, këmbëngulje dhe pasion.
Ju jeni ambasadorët tanë në botë. Kudo që të shkoni, mbani me vete vlerat e këtij universiteti: kërkimin e së vërtetës, respektin, bashkëpunimin dhe besimin në potencialin njerëzor.
Ju nxis të mos ndaleni së mësuari. Të vazhdoni të kërkoni, të krijoni, të guxoni. Sepse bota ka nevojë për mendje të hapura, për profesionistë të zotë dhe për qytetarë të përgjegjshëm — dhe pikërisht këtë përfaqësoni ju sot.
Në emër të gjithë universitetit, ju uroj suksese të mëdha në rrugën që ju pret.
Uroj që ëndrrat tuaja të marrin formë dhe të kthehen në realitet; që çdo hap i juaji të jetë i sigurt dhe i mbushur me vlera; dhe që gjithmonë ta mbani mend këtë ditë si një pikënisje e re drejt një të ardhmeje të ndritur.
Urime nga zemra për diplomimin tuaj!
Faleminderit dhe suksese në çdo hap të jetës.
