Një valë e fuqishme moti të keq ka goditur disa vende të Evropës, duke shkaktuar ndërprerje masive të energjisë elektrike, përmbytje, bllokim të rrugëve dhe anulime të dhjetëra fluturimeve. Britania e Madhe, Gjermania dhe Holanda janë ndër vendet më të prekura nga stuhitë Boelo dhe Austen, të shoqëruara me erëra të forta dhe reshje të dendura shiu.
Situata paraqitet veçanërisht problematike në Britani, ku rreth 82 mijë familje rezultonin pa energji elektrike mëngjesin e së dielës. Sipas Shoqatës së Rrjeteve të Energjisë (ENA), ekipet e emergjencës kishin arritur të rikthenin furnizimin për rreth 345 mijë konsumatorë, ndërsa puna për riparimin e dëmeve vijonte.
Në Skoci dhe në veri të Anglisë, erërat arritën shpejtësinë deri në 135 kilometra në orë, duke rrëzuar pemë dhe dëmtuar linjat elektrike. Autoritetet lëshuan paralajmërime për erëra të forta dhe përmbytje, ndërsa në disa zona u mbyllën rrugë dhe linja hekurudhore.
Pamjet nga qyteti britanik Blackpool treguan forcën e stuhisë, me këmbësorë që e kishin të vështirë të qëndronin në këmbë për shkak të erës.
Probleme serioze u regjistruan edhe në Irlandën e Veriut, ku rreth 7 mijë qytetarë mbetën pa energji elektrike. Shërbimet e trageteve nga Belfasti drejt Skocisë dhe Anglisë u anuluan, ndërsa rreth 15 fluturime u anuluan në Aeroportin Ndërkombëtar të Belfastit.
Moti ekstrem ka goditur edhe Gjermaninë. Në Freiburg, në jugperëndim të vendit, rreth 10 mijë familje mbetën pa energji elektrike pasi erërat e forta rrëzuan pemë mbi linjat e transmetimit. Një çati metalike u shkëput nga era dhe përfundoi mbi një instalim elektrik, duke shkaktuar dëme të tjera.
Ndërprerja e energjisë preku përkohësisht edhe Spitalin Universitar të Freiburgut, i cili u detyrua të kufizonte shërbimin vetëm për urgjencat që rrezikonin drejtpërdrejt jetën e pacientëve. Furnizimi me energji u rikthye rreth orës 11:00, ndërsa shërbimet spitalore nisën gradualisht të normalizoheshin.
Në Gjermani janë raportuar edhe dy persona të plagosur rëndë pas shembjes së skelave në një treg të hapur. Shërbimi Meteorologjik Gjerman paralajmëroi se erërat mund të tejkalonin shpejtësinë 100 kilometra në orë në zonat bregdetare dhe malore.
Stuhia Austen kishte goditur më herët edhe Francën, ku mbi 240 mijë familje mbetën pa energji elektrike të premten, përpara se sistemi atmosferik të zhvendosej drejt Belgjikës dhe Gjermanisë.
Ndërkohë, Holanda po përballet me probleme të mëdha në transportin ajror. Në aeroportin Schiphol të Amsterdamit janë anuluar rreth 90 fluturime gjatë së dielës, sipas një përllogaritjeje të agjencisë AFP. Shumica e anulimeve prekin destinacione evropiane, përfshirë Parisin, Romën dhe Dublinin.
Dhjetëra fluturime të tjera kanë pësuar vonesa ose janë anuluar në mbërritje, ndërsa autoritetet aeroportuale paralajmëruan se erërat e forta do të vazhdonin të ndikonin në operacionet ajrore gjatë gjithë ditës.
Autoritetet në vendet e prekura u kanë bërë thirrje qytetarëve të tregojnë kujdes, të shmangin udhëtimet e panevojshme në zonat më të rrezikuara dhe të ndjekin njoftimet zyrtare për kushtet atmosferike dhe transportin.
