Takimi i Presidentes së Kosovës Vjosa Osmani dhe kryeministrit Albin Kurti me Sekretarin Amerikan të Shtetit Anthony Blinken në Shtëpinë e Bardhë, shërbeu përveç konfirmimit të marrëveshjes energjetike, që është investimi më i vlefshëm i SHBA-së në Kosovë, edhe për forcimin e lidhjeve mes dy vendeve.
“Shtetet e Bashkuara zgjodhën momentin për një vizitë të tillë duke pasur parasysh nevojën për të konfirmuar praninë e tyre në rajon, tani që flitet për rreziqet e sigurisë për shkak të ndikimit rus në disa pjesë të Ballkanit Perëndimor – veçanërisht në Serbinë, e cila nuk po i bashkohet politikaneve të Perëndimit me sanksionet ndaj Moskës për shkak të konfliktit në Ukrainë.
Ndaj është edhe më e rëndësishme që Shtetet e Bashkuara të forcojnë bashkëpunimin me Kosovën”, raportojnë mediat serbe.
Pas takimit, Sekretari Amerikan i Shtetit, Anthony Blinken, përmes llogarisë së tij zyrtare në Twitter, ka njoftuar se në këtë takim, Shtetet e Bashkuara kanë ripërsëritur mbështetjen e tyre për integrimin e Kosovës në komunitetin ndërkombëtar dhe euroatlantik, si dhe kanë nënvizuar rëndësinë e dialogut ndërmjet Beogradit dhe Prishtinës nën kujdesin e BE-së.
“Ne e vlerësojmë mikpritjen e Kosovës për afganët, por edhe mbështetjen e fortë që ata i kanë dhënë Ukrainës”, shtoi Blinken.
Presidentja e Kosovës, Vjosa Osmani, në një prononcim për Zërin e Amerikës, pas takimit tha se Uashingtoni është garanci e angazhimit amerikan në rajon në një periudhë kur, siç tha ajo, agresioni rus në Ukrainë tregoi se cilat janë demokraci reale.
Osmani theksoi se bashkëpunimi më i ngushtë ndërmjet Kosovës dhe SHBA-së është i domosdoshëm, duke ditur trendet e ndikimit rus në Ballkan, përmes, siç tha ajo, satelitit të Putinit në rajon- Serbisë.
“Kemi biseduar më hollësisht se si të jemi më të kujdesshëm dhe shumë më të koordinuar me SHBA-në dhe aleatët e tjerë të NATO-s për të parandaluar këto plane destabilizuese që Putini ka me satelitët e tij”, tha Osmani.
Danas raporton se rezultatet e kësaj vizite për marrëdhëniet ndërmjet Beogradit dhe Prishtinës mund të ndihen në dy drejtime, njëri është forcimi i pavarësisë energjetike të Kosovës, dhe tjetra është përkrahja politike për anëtarësimin e Kosovës në organizatat ndërkombëtare.
“Duhet kujtuar se së fundmi është përcaktuar se në të ardhmen nuk do të ketë energji “falas” për serbët nga veriu i Kosovës dhe se Serbia nuk mund ta mbulojë atë në mënyrën që ka punuar deri më tani. Me zgjerimin e kapaciteteve energjetike të Kosovës falë investimeve nga SHBA-të, në të ardhmen do të mund të zvogëlohet ndjeshëm nevoja për produkte energjetike nga Serbia”, sqaron kjo media.
Drejtimi i dytë i ndikimit është ai politik, që do të thotë se SHBA-ja ka dërguar një mesazh edhe më të qartë se nuk do ta neglizhojë këtë rajon dhe se e di shumë mirë se cilët janë aleatët e saj, por edhe kush po largohet nga pozicionet e tyre.
“Blinken indirekt i dha dritën jeshile Kosovës që të vazhdojë me kërkesat për anëtarësim në organizatat ndërkombëtare dhe Prishtina tani do të ndihet e inkurajuar për të kërkuar ulëse në Këshillin e Evropës”, raporton Danas.
(BalkanWeb)
