Grupi famëkeq ushtarak rus, Wagner, ka shtuar përpjekjet për të rekrutuar mercenarë nga Turqia, Serbia, Republika Çeke, Polonia, Hungaria, Gjermania, Moldavia, Kanadaja dhe vendet e Amerikës Latine për shkak të humbjeve që ka pësuar në Ukrainë.
Sipas informacioneve të faqes së internetit Middle East Eye, organizata paraushtarake po pëson humbje të mëdha në Ukrainë për shkak të “çorganizimit të ushtrisë ruse”.
Fushata e rekrutimit mercenar po bëhet përmes oligarkëve rusë që jetojnë në Evropë dhe ndërmjetësuesit e tyre, të cilët kanë kontakte me grupe lokale nga fusha e krimit të organizuar.
Mercenarët e huaj, sipas informacioneve të Middle East Eye, po joshen me tarifa shumë të larta, duke u ofruar një pagë mujore prej 10 mijë dollarësh. Para luftës në Ukrainë, pagat e mercenarëve varionin nga 3000 deri në 5000 dollarë në muaj.
Një nga burimet e Middle East Eye thotë se Wagner “zakonisht rekruton njerëz me përvojë serioze ushtarake “, por tani organizata paraushtarake është gati të rekrutojë ata “që janë gati të vrasin dhe kanë nevojë për para”.
Në prag të botimit, ambasadorja e SHBA-së në OKB Linda Thomas-Greenfield akuzoi Wagnerin për shfrytëzimin e burimeve natyrore të Republikës së Afrikës Qendrore, Malit, Sudanit dhe rajoneve të tjera për të financuar “makinën ushtarake të Moskës” në Ukrainë.
Instituti Amerikan për Studimin e Luftës (ISË) gjithashtu tërhoqi vëmendjen për faktin se Wagner krijoi një kanal në aplikacionin e mesazheve Telegram, i cili mund të përdoret, ndër të tjera, si një mjet rekrutimi.
Në shtator, faqja e internetit SOTA raportoi se Wagner po rekrutonte me forcë të burgosur në burgjet ruse për t’i dërguar ata në luftën në Ukrainë, duke premtuar para dhe amnisti pasi ata kishin shërbyer gjashtë muaj në front. Në një numër rastesh, të burgosurit u rekrutuan personalisht nga biznesmeni dhe krijuesi i supozuar i Wagner, Yevgeny Prigozhin.
Mercenarët e Wagner-it për vite besohet se janë përfshirë fshehurazi në konflikte të ndryshme të armatosura me mbështetjen e Kremlinit. Moska gjithmonë ka mohuar çdo lidhje me organizata private paraushtarake. Prigozhin, i cili besohet se ka lidhje të ngushta me presidentin rus Vladimir Putin, pranoi në fund të shtatorit se ishte ai që themeloi Wagner në maj 2014 për të mbështetur separatistët e Donbasit në Ukrainën lindore.
