Partia Socialiste ka propozuar një projektvendim për ngritjen e Komisionit të Posaçëm Parlamentar për Realizimin e Reformës Zgjedhore, dokument i cili zbulohet nga BalkanWeb.
Sipas propozimit të PS, ky komision ka për detyrë kryesore hartimin e ndryshimeve ligjore në fushën zgjedhore, duke marrë parasysh rekomandimet e raporteve të OSBE/ODIHR-it, të cilat përfshijnë vlerësimet nga zgjedhjet vendore të 14 majit 2023, zgjedhjet e mëparshme të patrajtuara dhe raportin e pritur për zgjedhjet e 11 majit 2025. Po ashtu, komisioni do të trajtojë propozimet e institucioneve përgjegjëse për zgjedhjet, partive politike parlamentare dhe organizatave jofitimprurëse, duke përfshirë edhe përgatitjen e ligjit për financimin e partive politike.
Komisioni do të përbëhet nga 16 anëtarë, me përfaqësues të barabartë nga pozita dhe opozita – 8 nga Partia Socialiste dhe 8 nga partitë e tjera parlamentare. Ai do të drejtohet nga dy bashkëkryetarë, një nga Partia Socialiste dhe një nga Partia Demokratike, për të garantuar një proces të balancuar dhe gjithëpërfshirës.
Për të siguruar transparencë dhe ekspertizë të lartë, pranë komisionit do të formohet edhe një grup ekspertësh teknikë, ndërsa organizata ndërkombëtare si OSBE/ODIHR, Këshilli i Europës, Komisioni i Venecias, si dhe përfaqësues nga BE dhe SHBA-të, janë të ftuar të ndjekin dhe të japin asistencë teknike gjatë punimeve.
Procesi synon të mbajë konsensusin si parim themelor të vendimmarrjes, duke u mbështetur në dialogun dhe mirëkuptimin mes palëve. Në rast se nuk arrihet marrëveshje për çështje të veçanta, do të kërkohet asistenca e ekspertëve ndërkombëtarë për zgjidhje.
Komisioni do të funksionojë për një periudhë 9-mujore, me mundësi zgjatjeje në rast nevoje, dhe do të mbështetet financiarisht dhe logjistikisht nga Sekretari i Përgjithshëm i Kuvendit.
Propozimi i PS:
REPUBLIKA E SHQIPËRISË
KUVENDI
PROJEKTVENDIM
PËR NGRITJEN E KOMISIONIT TË POSAÇËM PARLAMENTAR
PËR REALIZIMIN E REFORMËS ZGJEDHORE
Në mbështetje të neneve 77, pika 1, dhe 78, pika 1, të Kushtetutës dhe të neneve 24 dhe 55, pika 1, të Rregullores së Kuvendit, me propozimin e një grupi deputetësh,
K U V E N D I
I REPUBLIKËS SË SHQIPËRISË
V E N D O S I:
- Ngritjen e Komisionit të Posaçëm Parlamentar për Realizimin e Reformës Zgjedhore.
- Komisioni ka për detyrë hartimin e ndryshimeve legjislative për reformën zgjedhore, në veçanti trajtimin e rekomandimeve të raporteve të OSBE/ODIHR-it për zgjedhjet vendore të 14 majit 2023, zgjedhjet e mëparshme të patrajtuara dhe të raportit të pritshëm për zgjedhjet e 11 majit 2025; trajtimin e rekomandimeve të institucioneve përgjegjëse për zgjedhjet, të partive politike parlamentare dhe organizatave jofitimprurëse, si dhe hartimin e ligjit për financimin e partive politike.
III. Komisioni i Posaçëm ngrihet mbi bazën e barazisë pozitë-opozitë. Në përbërje të tij do të ketë 16.anëtarë, nga të cilët 8 janë përfaqësues të Partisë Socialiste, 8 përfaqësues nga Partitë e tjera parlamentare. Emrat e anëtarëve të Komisionit përcaktohen me vendim të Kuvendit.
- Komisioni drejtohet nga dy bashkëkryetarë, një nga Partia Socialiste dhe një nga Partia Demokratike.
- Pranë Komisionit ngrihet grupi i ekspertëve teknikë. Përbërja dhe mënyra e funksionimit të tij përcaktohen me vendim të Komisionit të Posaçëm Parlamentar.
- Prezenca e OSBE-së në Shqipëri, ekspertë të OSBE/ODIHR-it, Këshilli i Europës, ekspertë të Komisionit të Venecias, si dhe përfaqësues dhe/ose ekspertë të BE-së dhe SHBA-ve ftohen të ndjekin, të japin asistencë dhe ekspertizë teknike në punimet e Komisionit dhe të grupit të ekspertëve teknikë të ngritur pranë tij.
VII. Çdo parti që përfaqësohet në komision ka të drejtë të propozojë amendamente për diskutim dhe miratim. Palët duhet të angazhohen të gjejnë konsensusin në lidhje me to. Për çështje të veçanta për të cilat palët nuk kanë gjetur konsensus do të vlerësohet dhe kërkohet asistenca e ekspertizës së OSBE/ODIHR-it dhe Komisionit të Venecias.
VIII. Mbledhjet e Komisionit janë të vlefshme kur janë të pranishëm më shumë se gjysma e anëtarëve të Komisionit. Vendimmarrja e Komisionit do të synojë konsensusin e gjerë për të gjitha propozimet. Vendimet e Komisionit quhen të miratuara me shumicën e votave të të gjithë anëtarëve, por vetëm kur kanë njëkohësisht konsensusin e të dy bashkëkryetarëve.
- Komisioni e ushtron veprimtarinë e tij për një afat 9-mujor nga miratimi i këtij vendimi. Në rast nevoje, me kërkesë të arsyetuar të dy bashkëkryetarëve, Kuvendi vendos zgjatjen e afatit të ushtrimit të veprimtarisë së Komisionit me një vendim të veçantë të Kuvendit.
- Ngarkohet Sekretari i Përgjithshëm për krijimin e kushteve të punës, si dhe për mbështetjen me burime njerëzore, financiare dhe logjistike të veprimtarisë së Komisionit dhe të grupit të ekspertëve të ngritur pranë tij.
- Ky vendim hyn në fuqi menjëherë.
K R Y E T A R I
Niko PELESHI
