Ndërsa negociatat për një armëpushim në Ukrainë janë në vështirësi, ka një vijë tashmë të konsoliduar të dialogut midis Selisë së Shenjtë dhe Rusisë në lidhje me veprimin e Vatikanit në fushën humanitare dhe mundësinë e shkëmbimit të të burgosurve me Kievin.

Sot u zhvillua një bisedë telefonike mes Kryepeshkopit Paul Richard Gallagher, Sekretar i Vatikanit për Marrëdhëniet me Shtetet dhe Serghei Lavrov, Ministri i Punëve të Jashtme të Federatës Ruse.

Dialogu, njoftoi Zyra e Shtypit e Selisë së Shenjtë, “iu kushtua kornizës së përgjithshme të politikës botërore, me vëmendje të veçantë situatës së luftës në Ukrainë dhe disa nismave që synojnë ndalimin e veprimeve të luftës”.

Është rikonfirmuar gjithashtu gatishmëria e Selisë së Shenjtë për të vazhduar angazhimin e saj humanitar në çështjet që kanë të bëjnë me shkëmbimin e të burgosurve. Së fundi, “u shqyrtuan edhe disa çështje që lidhen me jetën fetare dhe, në veçanti, situatën e Kishës Katolike në Federatën Ruse.

Ministri Lavrov shprehu mirënjohjen ndaj Selisë së Shenjtë për ndihmën e saj në zgjidhjen e çështjeve humanitare në lidhje me konfliktin në Ukrainë. Në muajt e fundit, Rusia është shprehur vazhdimisht se e konsideron Selinë e Shenjtë një bashkëbisedues në çështjen që ka të bëjë me Ukrainën, si për pozicionin “e ekuilibruar” të mbajtur gjithmonë nga Vatikani, ashtu edhe për atë “diplomaci humanitare” kaq të dashur për Papën dhe të dërguarin e tij për paqen, kardinalin Matteo Zuppi.

(BalkanWeb)