Nick Kyrgios del fitues në “Battle of the Sexes” të zhvilluar në Dubai. Tenisti australian mposhti Aryna Sabalenkën me rezultatin 6-3, 6-3, në një ndeshje ekzibicioni që zgjati rreth një orë e shtatëmbëdhjetë minuta. Përballja ofroi spektakël dhe argëtim, me Sabalenkën që ndezi publikun emiratas falë goditjeve të saj të fuqishme dhe disa momenteve të veçanta jashtë lojës.
Kyrgios e nisi takimin me një qasje lozonjare, duke shkëmbyer batuta dhe provokime sportive me numrin një të renditjes WTA, por në momentet kyçe rriti ndjeshëm intensitetin. Ashtu si në setin e parë, edhe në të dytin, në rezultatin 3-3, australiani përshpejtoi ritmin, mori avantazhin dhe e administroi deri në fund. Sabalenka u ndikua edhe nga rregullorja e veçantë e ndeshjes, që nuk lejonte shërbimin e dytë, por arriti gjithsesi të anulonte tre match point, duke marrë duartrokitjet e publikut.
Me këtë sukses, Kyrgios bëhet tenisti i tretë nga kategoria ATP që fiton një “Battle of the Sexes”, pas Bobby Riggs në vitin 1973 dhe Jimmy Connors në vitin 1992. Billie Jean King mbetet ende e vetmja grua që ka triumfuar në këtë përballje historike.
