Ish-ministri i Jashtëm Besnik Mustafaj, i ftuar në rubrikën “Opinion” në News24 ka folur në lidhje me situatën në veri të Kosovës.

Mustafaj deklaroi se vendimi i Kurtit për të hedhur hapin tjetër pas zgjedhjeve është i ligjshëm, por sipas tij kryeministri i Kosovës ka shpërfillur rrezikshmërinë që do vinte me këtë vendim.

Ai shtoi se Kurti mund të ishte përgatitur duke u konsultuar fillimisht me ndërkombëtarët, ndërsa vijoi duke thënë se protestuesit në veri nuk kanë të drejtë.

Sipas tij protestuesit në veri të Kosovës janë mercenarë të dërguar nga Serbia, e cila mbështetet fortë nga Rusia që kërkon të krijohet një tjetër vatër konflikti për të tërhequr vëmendjen nga ajo që po ndodh në Ukrainë. Zgjedhjet në Shqipëri.

“Vendimi i Kurtit për të hedhur hapin tjetër pas zgjedhjeve është i ligjshëm. Ajo që mund të thuhet tani është se Kurti shpërfilli rrezikshmërinë që do vinte me këtë hap dhe nuk u përgatit duke pasur me vete ndërkombëtarët. Kurti duket i vendosur në ato që bën, por në komplikacionet e veriut të Kosovës, duhet një fleksibilitet më i madh. Ata që protestojnë nuk kanë asnjë të drejtë të protestojnë. Ka që pas luftës që serbët e Kosovës përdoren nga Beogradi për të destabilizuar qeverinë e Kosovës.

Kurtin do e këshilloja të konsultohej me ambasadorin amerikan, atë të BE-së dhe KFOR-in që të paktën ata t’i kishte me vete. Tani ambasadori amerikan e quan ndërhyrje të njëanshme, reporteja e BE për Kosovën thotë se futja e zyrtarëve është legjitime por jo e ligjshme. Parlamenti Evropian e ka ditur se komuniteti serb nuk do merrte pjesë në zgjedhje.

Kurti ndodhet në pozitë të vështirë pasi ka angazhim ndaj opinionit publik. Ai ka rënë në një kurth që nuk e ka parashikuar ku të njëjtët aleatë ndërokmbëtarë që e inkurajuan për të bërë zgjedhje. Gabimi i Kurtit ishte para se të merrte vendimin për të ccuar të zgjedhur në institucione, të konsultohej për hapat e radhës me aleatët. Reagimi amerikan ishte jo proporcional. Blinken u shpreh në mënyrë qortuese për Kosovën.

Qeveria ruse inkurajon këto qëndrime të Beogradit sepse i intereson shumë një vatër e re tensioni që do shpërqendronte vëmendjen nga Ukraina. Gjeopolitika hyn sepse Beogradi nuk ka pse të jetë pas këtyre protestave. Prapa Beogradit është Rusia, vendosmëria e të cilëve është e madhe pasi kanë goditur edhe me molotov. Ata nuk janë aty për të negociuar. Nëse provokimi shkon shumë larg do ketë një përgjigje. Nuk besoj se do kemi një zgjerim të situatës konfliktuale. Ata që shkojnë aty dhe sulmojnë janë mercenarë të Serbisë. Duhet të ketë një presion të fortë ndërkombëtar ndaj Vuçiçit”, u shpreh ai.