Zëdhënësi i Ministrisë së Jashtme të Katar, Majed al-Ansari, deklaroi në një konferencë për shtyp se Doha nuk ishte informuar nga Irani për sulmet e afërta me raketa, duke theksuar mungesën e komunikimit nga Teherani. “Vendi ynë nuk u njoftua nga Irani për sulmet e afërta me raketa”, tha al-Ansari, duke shtuar se pavarësisht provokimeve, Katari mbetet i gatshëm t’i përgjigjet me forcë çdo kërcënimi dhe se sulmet e fundit “nuk do të mbeten pa përgjigje”.

Sipas tij, avionë luftarakë iranianë që u rrëzuan një ditë më parë kishin shkelur hapësirën ajrore të Katarit, pavarësisht paralajmërimeve të dhëna. “Avionët iranianë po shkonin drejt Dohas përpara se të bëheshin shënjestër”, u shpreh ai, duke theksuar se hetimet vazhdojnë për identifikimin e anëtarëve të ekuipazhit. Al-Ansari shtoi gjithashtu se autoritetet nuk kanë informacion për praninë e anëtarëve të Mossad që mund të veprojnë fshehurazi në vend.

Sipas një diplomati që foli për AFP në kushte anonimiteti, tetë persona u plagosën të shtunën (28/2) në sulmet iraniane ndaj Katarit, të cilat u kryen me 44 raketa dhe tetë dronë. Burimi shtoi se një sistem radari me rreze të gjatë veprimi u dëmtua në bazën ajrore Al Udeid Air Base, instalimi më i madh ushtarak amerikan në rajon.

Ndërkohë, Emiri i Katarit, Tamim bin Hamad Al Thani, zhvilloi një bisedë telefonike me Presidentin e SHBA-së, Donald Trump, duke bërë thirrje për përmbajtje të “një përshkallëzimi të rrezikshëm” në Lindjen e Mesme. Ministria e Jashtme e Katarit e cilësoi operacionin iranian si një “shkelje flagrante të sovranitetit kombëtar” dhe theksoi se vendi “rezervon të drejtën e plotë për t’iu përgjigjur këtij sulmi”.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: