Një agjent federal i emigracionit në Minneapolis ka qëlluar dhe plagosur në këmbë një burrë nga Venezuela, pasi ai dhe dy persona të tjerë sulmuan fizikisht oficerin gjatë një përpjekjeje për arrestim, njoftoi të mërkurën Departamenti Amerikan i Sigurisë Kombëtare (DHS).
Incidenti ndodhi rreth orës 18:50 me orën lokale, kur agjentët po kryenin një kontroll të trafikut ndaj një emigranti të paligjshëm nga Venezuela që kishte hyrë në SHBA në vitin 2022. Burri tentoi të largohej me automjet dhe u përplas me një veturë të parkuar, thanë autoritetet.
Pas përplasjes, i njëjti person u përpoq të ikte në këmbë, por u kap dhe filloi një përleshje me agjentin federal. Teksa ndodheshin në tokë, **dy persona të tjerë dolën nga një apartament i afërt dhe sulmuan oficerin duke përdorur një lopatë bore dhe një bisht fshese, sipas njoftimit të DHS-së.
Në kaosin që pasoi, emigranti që po arrestohej u shkëput nga kapja dhe, sipas deklaratës së agjencisë, ai gjithashtu filloi ta godiste oficerin. Agjenti, i “frikësuar për jetën e tij”, hapi zjarr dhe qëlloi burrin në këmbë.
Të tre personat më pas u mbyllën brenda në apartament, por agjentët federalë arritën t’i kapin dhe t’i marrin nën arrest. Burrë venezueliani dhe agjenti janë dërguar në spital; gjendjet e tyre raportohet se janë të qëndrueshme.
Ngjarja ndodh vetëm një javë pas një incidenti tjetër të dhunshëm në Minneapolis ku një agjent i Immigration and Customs Enforcement (ICE) vrau një grua 37-vjeçare gjatë një operacioni, gjë që ka nxitur tensione të forta dhe protesta të shpeshta në qytet. Pas incidentit të së mërkurës, protestues të mbledhur në zonë kanë hedhur objekte dhe fishekzjarre ndaj forcave të policisë, të cilat përdorën gaz lotsjellës për të shpërndarë turmën, thanë zyrtarë lokalë. Kryetari i policisë së Minneapolis dhe kryebashkiaku kanë bërë thirrje për qetësi dhe shmangie të dhunës, teksa shqetësimet mbi prezencën e fortë të agjentëve federalë në qytet vazhdojnë të rriten.
