Rumania ka marrë vendimin për të mbyllur përkohësisht centralin e saj të vetëm bërthamor në Cernavodë për shkak të rënies drastike të nivelit të ujit në lumin Danub. Ky zhvillim ka ngritur shqetësime të mëdha për stabilitetin e furnizimit me energji elektrike në vend.

Kjo është hera e parë në 23 vjet që ky central përballet me një bllokim të tillë. Kushtet ekstreme meteorologjike, temperaturat e larta dhe thatësira e zgjatur kanë reduktuar ndjeshëm prurjet e lumit Danub, uji i të cilit shërben drejtpërdrejt për ftohjen e reaktorëve. Për rrjedhojë, niveli i lumit ka rënë në parametra kritikë, duke pamundësuar vazhdimin e procesit të ftohjes në mënyrë të sigurt.

Centrali i Cernavodës mbulonte rreth një të pestën e prodhimit të energjisë elektrike në Rumani. Për të kompensuar këtë mungesë në rrjetin kombëtar, autoritetet kanë nisur importimin e energjisë elektrike nga Ukraina, ndërsa po mbështeten edhe te burimet alternative vendase për të shmangur ndërprerjet për konsumatorët.

Autoritetet rumune po monitorojnë me ritëm intensiv situatën hidrologjike në shtratin e Danubit. Rikthimi i reaktorëve në punë do të varet tërësisht nga përmirësimi i nivelit të ujit dhe garantimi i ftohjes teknike pa asnjë risk sigurie.

Ngjarja nxjerr edhe një herë në pah ndikimin e thellë që klimata e nxehtë dhe thatësirat e tejzgjatura kanë mbi infrastrukturën kritike energjetike, veçanërisht mbi centralet që varen drejtpërdrejt nga burimet ujore.