Një 22-vjeçare nga Australia humbi jetën tragjikisht të premten, më 30 janar, në një vendpushim skish në Japoni, pasi u përfshi në një aksident fatal me një ashensor skish ndërsa po bënte snowboard. Ngjarja ndodhi në Tsugaike Mountain Resort, në qytetin Otari. Viktima, Brooke Day, me origjinë nga Queensland i Australisë, ndodhej me pushime me miqtë e saj. Sipas autoriteteve lokale, aksidenti ndodhi në momentin kur ajo po zbriste nga ashensori i skive.
Rripi i çantës së shpinës së saj u ngec në mekanizmin e ashensorit, duke e penguar të shkëputej nga pajisjet. Stafi i resortit aktivizoi menjëherë butonin e emergjencës për të ndaluar sistemin, por përpjekjet për ta liruar u vështirësuan pasi çanta e shpinës mbeti e lidhur fort me trupin e saj. Gjatë minutave kritike, 22-vjeçarja u zvarrit disa metra në dëborë, pa mundur të çlirohej. Kur ekipet e emergjencës arritën ta nxirrnin, ajo kishte pësuar arrest kardiak. Brooke Day u transportua me ambulancë në spital, por mjekët nuk arritën ta shpëtonin. Vdekja e saj u konfirmua më vonë nga autoritetet japoneze.
Departamenti Australian i Punëve të Jashtme dhe Tregtisë konfirmoi vdekjen e 22-vjeçares dhe bëri të ditur se familja po mbështetet nga ambasada australiane në Japoni. “I shprehim ngushëllimet tona më të thella familjes në këtë kohë të vështirë,” thuhet në deklaratë. Pas incidentit, Tsugaike Mountain Resort dhe operatori i ashensorit kërkuan ndjesë publike dhe njoftuan nisjen e një hetimi të brendshëm për të zbardhur shkaqet e aksidentit dhe për të rishikuar protokollet e sigurisë. Sistemi i ashensorit, me kapacitet deri në 1,000 persona në orë, u mbyll përkohësisht.
Ngjarja ka rihapur debatin mbi sigurinë në sportet dimërore, veçanërisht rreziqet që lidhen me përdorimin e çantave të shpinës dhe pajisjeve ndihmëse gjatë përdorimit të ashensorëve të skive. Ekspertët paralajmërojnë se aksesorë të tillë mund të përbëjnë rrezik serioz nëse nuk përdoren sipas rregullave të sigurisë. Ky aksident i rëndë i shtohet një serie incidentesh të ngjashme në qendra skish në vende të ndryshme të botës, duke ngritur shqetësime për standardet e sigurisë dhe mirëmbajtjen e infrastrukturës së teleferikëve dhe ashensorëve të skive.
