Numri i viktimave nga tragjedia e tragetit në liqenin Kariba, në Zimbabve, ka shkuar në 84. Policia njoftoi se katër trupa të tjerë u nxorën nga ujërat gjatë së dielës, ndërsa operacionet e kërkimit vijojnë për gjetjen dhe identifikimin e personave të zhdukur.
Trageti, u përmbys të mërkurën në ujërat e trazuara të liqenit artificial Kariba, në një nga aksidentet më të rënda detare të regjistruara në vend.
Sipas autoriteteve, anija ishte e licencuar për të transportuar 90 pasagjerë, por në momentin e tragjedisë kishte në bord 114 të rritur, pesë anëtarë të ekuipazhit dhe një numër të papërcaktuar fëmijësh.
Mbrojtja civile kishte raportuar më herët se 77 persona ishin shpëtuar. Ndërkohë, me 84 trupat e gjetur deri tani, numri i personave që ndodheshin në traget rezulton të ketë qenë të paktën 161.
Autoritetet njoftuan të shtunën për gjetjen e 25 trupave të tjerë, ndërsa ekipet e kërkim-shpëtimit vijojnë punën në liqen. Policia thotë se mbetet e bindur se viktimat e tjera do të gjenden, megjithëse numri i personave të zhdukur nuk është përcaktuar ende.
Shumica e pasagjerëve dyshohet se ishin banorë të zonave rurale dhe tregtarë peshku që jetojnë përgjatë brigjeve të liqenit Kariba. Trageti shërbente si një lidhje jetike për komunitetet e izoluara, të cilat përballen me rrugë të dëmtuara dhe mungesë të transportit publik.
Liqeni Kariba kufizohet me Zambian dhe ndodhet rreth 280 kilometra në veri të kryeqytetit Harare. Tragjedia ka ngritur pikëpyetje të mëdha mbi sigurinë e transportit të pasagjerëve dhe respektimin e kapaciteteve të lejuara të mjeteve lundruese në zonat rurale të Zimbabves.
