Dhjetëra të rinj të plagosur në zjarrin që ra në një bar natën e Vitit të Ri në Zvicër u transferuan në njësi të specializuara për djegie në të gjithë Europën me lëndime të rënda të premten, pasi u lënduan nga flakët tragjike, të cilat kanë vrarë të paktën 40 persona.

Gjetjet fillestare, raporton Reuters, treguan se zjarri që u përhap midis turmës kryesisht të të rinjve në barin Le Constellation në vendpushimin zviceran të skive Crans-Montana, ka të ngjarë të jetë shkaktuar nga qirinjtë ndriçues të cilët përdoren për efekt dekorues dhe ishin vendosur shumë afër tavanit, tha prokurori lokal.

Ndërkohë, hetuesit punuan për identifikimin e trupave të djegur, duke paralajmëruar se ky proces ishte shumë i ndjeshëm dhe do të kërkonte kohë.

Djegiet ishin aq të rënda sa zyrtarët zviceranë thanë se mund të duhen ditë para se të emërtojnë të gjithë të vrarët nga zjarri. Numri zyrtar është 40 të vdekur, ndërsa 119 janë plagosur, shumë prej tyre shumë rëndë. Këto shifra nuk janë përfundimtare, thanë zyrtarët.

“Shumë prej të plagosurve ende po luftojnë për jetën e tyre sot”, tha shefi i zonës së Valais, Mathias Reynard, në një konferencë për shtyp.

Rreth 50 nga të plagosurit janë transferuar ose do të transferohen në njësitë e djegies në spitale të tjera në Europë, tha ai.

Gjermania dhe Franca janë ndër vendet që po trajtojnë disa nga të plagosurit.