Pasagjerët që i mbijetuan përplasjes së dy trenave në Greqi, e ndodhur disa ditë më parë kanë treguar tmerrin që kanë përjetuar në ato momente.
Në një intervistë për mediat greke, një nga pasagjerët ka thënë se ishte një moment i frikshëm duke treguar se nga përplasja u thyen të gjitha xhamat dhe copat e tyre u kanë rënë në kokë.
“Kur mbërritëm në Tempes kishte disa që po flinin, disa lexonin, ndërsa unë kisha laptopin. Dëgjojmë një zhurmë shurdhuese dhe vagoni 5 po dridhej dhe ngrihej në ajër. Xhamat u thyen dhe na ranë në kokë. Të gjithë në një moment thamë,-“O Zot ne do të vdesim”, kishte fëmijë që qanin , të gjithë ishim në panik. Ka jetuar në ferrin e Dantes”, ka treguar një prej pasagjerëve.
Aksidenti tragjik në Greqi shkaktoi të paktën 57 viktima dhe dhjetëra të tjerë të plagosur. Ndërkohë kryeministri grek Kyriakos Mitsotakis, është zotuar se do të zbardhet e vërteta e plotë e shkakut të kësaj tragjedie dhe se përgjegjësit do të përballen me drejtësinë.
(BalkanWeb)
